Сэтгэл санаа тавгүйрхэх, гутрах, өөрийн эмх замбараагүй бодлоо хэрхэн цэгцлэхээ мэдэхгүй бухимдах үе бидэнд нэг бус удаа тохиолддог. Хүн бүрийн сэтгэл хямралаасаа салах арга барил нь өөр өөр байдаг. Жишээ нь хэн нэгэнтэй ярилцах, эсвэл зүгээр л ганцаараа байх.
Дотно найзуудтайгаа уулзан сэтгэлээ онгойтол нь уудалж, зөвлөгөө авах, ярилцах нь бас тайвшрал өгдөг. Дараа нь ойрын сонин хачин, хөгжилтэй үйл явдлаасаа хуваалцаж цагийг зугаатай өнгөрөөх. Эсвэл сэтгэл тавгүйтүүлсэн зүйлийн талаар огт бодолгүй бүгдийг мартаж зугаалж, тархиа чөлөөлөх гэх мэт. Гэвч та зан чанарын хувьд дотогшоо, илэн далангүй ярилцахаас эмээдэг төрлийн хүн бол бичих аргыг зөвлөж байна. Хүмүүсийн төдийлөн сайн мэддэггүй сэтгэл санааг өргөх үр дүнтэй аргын нэг бол бичих юм. Шууд бичихэд эв дүйгээ олохгүй, хаанаас нь хэрхэн эхлэхээ мэдэхгүй байвал та зүгээр л бал цаас нийлүүлээд өөрт төрж байгаа мэдрэмжүүдээ бичээд үзээрэй. Ингэснээр:
- Тайвшралыг мэдэрнэ
- Стрессийн түвшин буурна
- Сэтгэл түгшилтийг бууруулна
- Бодлоо цэгцлэхэд тусална
- Мөн нэг төрлийн бясалгал болдог ажээ.
Хүн бүрд л хэн нэгнээс бэлгэнд авсан эсвэл гэрт байж л байдаг хэзээ юунд ашиглахаа мэдэхгүй дэвтэр байдаг шүү дээ. Тэгвэл та одоо шүүгээндээ хадгалсан тэр нэг дэвтрээ аваад өөрийн мэдрэмжээ хуваалцагч найзаа болгоорой.
Т. Энхжин
