Газрын ховор элементийн Халзан бүрэгтэй ордын асуудлаар УИХ-ын “Ерөнхий хяналтын сонсгол” Төрийн ордонд боллоо. Үүнтэй холбоотойгоор УИХ-ын гишүүн Г.Лувсанжамцаас түүний байр суурийг тодрууллаа.
Оюутолгой, Гашуунсухайтын холболтыг яриад арван хэдэн жил, “Орано Майнинг”-ийн гэрээнийг яриад 20-иод жил болж байна. Юм болгоныг ингээд яриад, хойшоо хараад явж байх юм уу. Хэзээ эдийн засаг өсөж, хүмүүсийн амьдрал сайжирж, ажлын байр, орлого нэмэгдэх юм. Дандаа шийдэл биш хэрүүл ярьж байдаг улс төрийг өнгөрсөн нэг жилийн хугацаанд хараад хамт ажиллаж байгаа хүмүүсийнхээ заримд нь гутарч эхэлж байна.
Уул уурхай гэхээр “Пүү паа” гэж эсэргүүцдэг улс төрчид болимоор байна. Монгол улс 2008 он хүртэл ДНБ нэг хүнд 1000 доллар байсан бол өнөөдөр 5, 6 мянган доллар болоод, өсөөд явж байна. Энэ бол манай уурхайчид, инженерүүд, байгаль судлаачдын буян. Газрын ховор элементийг бол дэмждэг. Манайх нүүрсний экспортоороо татварын орлогынхоо ихэнх хувийг бүрдүүлдэг. Цаашдаа энэ маань тодорхойгүй байдалд орж байна. Ялангуяа худалдаж авдаг хөрш маань татгалзъя гээд бодитоор хэлээд байна. Тэгэхээр бид нар өөр юуг зарж амьдрах вэ? Нөгөө талдаа бид алт, уран, газрын ховор элемент гэсэн бусад боломж бололцоогоо судлаад, зөв шийдвэр гаргаад экспортоо сайжруулах ёстой.
