Непалын хойд зүгийн Гималайн нуруунд болсон цасан нурангийн улмаас Францын нэг иргэн болон хоёр непал хүн амиа алдсан гэж цагдаагийн байгууллага мэдээлэв.
Ослын хэрэг Даваа гарагт Гринвичийн цагаар 03:15, Долакха дүүрэгт орших Ялун Ри уулын баазын ойролцоо болсон байна. Мөн хоёр итали, нэг герман, нэг канад иргэн сураггүй болсон бөгөөд тэднийг амь үрэгдсэн байж магадгүй гэж айдас төрүүлж байгаа ч эрлийн ажиллагаа үргэлжилж байна. Эдгээр долоон уулчин болон нутгийн хөтөч нар нь нийт 12 хүний бүрэлдэхүүнтэй багийн хэсэг байсан бөгөөд нуранга болохоос нэг цагийн өмнө авиралтад гарсан гэж дүүргийн цагдаагийн дарга BBC-д мэдээлжээ.
Таван непал хөтөч амьд үлдэж бааз руу буцсан бөгөөд хөнгөн шарх авсан ч амь насанд аюулгүй байна.
“Гурван цогцсыг илрүүлсэн бөгөөд дөрвийг нь хайх ажил үргэлжилж байна” гэж орон нутгийн цагдаагийн ахлах дэслэгч Гьян Кумар Махато BBC-д ярьжээ.
Амиа алдсан хоёр непал иргэн тухайн уулчдын багийн гишүүн байсан уу, эсвэл өөрсдөө бие даан авиралт хийж байсан уу гэдэг нь одоогоор тодорхойгүй байна.
Махатогийн мэдээлснээр, аврах нисдэг тэрэг Даваа гарагт Долакха дүүргийн На Гаун хэмээх бүс нутагт буусан бөгөөд уг газар нь Ялун Ри уулын баазаас тав орчим цагийн явган замын зайтай аж.
Эрлийн ажиллагаанд цаг агаар, газарзүйн хүндрэлүүд саад болж байна гэж орон нутгийн хэвлэлүүд мэдээлжээ.
The Kathmandu Post сонинд мэдээлснээр, уулчдын баг анх 6,332 метрийн өндөртэй Долма Кханг уулыг авирахаар бэлтгэж байсан гэнэ.
Нөгөөтэйгүүр, баруун Непалд орших Панбари ууланд авиралт хийж байгаад сураггүй болсон хоёр итали уулчныг эрэх ажиллагаа мөн үргэлжилж байна. Стефано Фарроното болон Александро Капуто нар гурван хүний бүрэлдэхүүнтэй багийн гишүүн байсан бөгөөд тэдэнтэй хамт гурван нутгийн хөтөч хэцүү нөхцөлд гацсан байжээ. Гурав дахь итали гишүүн Вельтер Перлино (65 настай)-г аврагчид эсэн мэнд гаргасан байна.
Намрын улирал нь Непалд авиралт, аялал жуулчлалын хамгийн идэвхтэй үе байдаг ч цаг уурын огцом өөрчлөлт, цасан нурангийн эрсдэл байсаар байдаг.
Өнгөрсөн долоо хоногт Монта циклон Непал даяар хүчтэй бороо, цас оруулж, Гималайн бүсэд олон хүн гацахад хүргэжээ. Тухайлбал, баруун Мустанг мужид гацсан хүмүүсийн дунд хоёр британ, нэг ирланд эмэгтэй байсан бөгөөд тэднийг хэдэн өдрийн дараа авран гаргасан байна.
Мөн Өмнөд Эверестийн ойролцоо өнгөрсөн аравдугаар сард гарсан хүчтэй цаг агаарын улмаас хэдэн зуун жуулчин хэцүү байдалд орж, түр хугацаанд тусгаарлагдсан тохиолдол бүртгэгджээ.
Эх сурвалж: BBC news
