Биеийн жингээ хасахаар эрмэлзэж буй хүмүүс нимбэгтэй ус уух нь жин хасахад эерэг үр дүнтэй гэдгийг сайн мэдэх байх. Гэхдээ нимбэгтэй ус уух нь жин хасахад төдийлөн нөлөөлөхгүй гэдгийг Women’s Health сэтгүүл нийтлэлээрээ дамжуулан мэдээлжээ. Тэгвэл жин хасах хүсэлтэй хүмүүс нимбэгтэй усыг ямар уух зүйлсээр орлуулж, хэрхэн жин хасах үйл явцаа түргэсгэж болохыг бид танд хүргэж байна. Мөн аливаа жин хасах хөтөлбөрийг эхлүүлэхээс өмнө эмчийн зөвлөгөө авах шаардлагатай байдгийг анхаарна уу. Учир нь хүн биеийн жингээ хасахын тулд аливаа төрлийн дэглэм, дасгал хөдөлгөөнийг эрчимтэй хийснээр эрдсийн дутагдалд орох, зарим эрхтнүүд ачаалал даахгүй үйл ажиллагаа нь доголдох аюултай байдаг. Тиймээс биеийн жинг эрчимтэй шатаах гэхээс илүү зөв дадал зуршил, тогтмол амьдралын хэв маягтай болох нь насан туршдаа хүссэн жин дээрээ байхад тань тусална.
КОФЕ
Кофе бол байгалийн гаралтай эрч хүчний ундаа юм. Journal of Sports Medicine and Physical Fitness сэтгүүлд бичсэнээр дасгал хийхээсээ өмнө нь кофе уух нь эрч хүчээр хангаж, ядралгүй илүү удаан хичээллэх боломжийг олгодог байна. Gym-д хичээллэхээсээ өмнө кофе уусан хүмүүс хөлийнбулчингийн дасгал хийхэд зориулагдсан төхөөрөмж дээр 20 хувь илүү давталттай хичээллэж байсныг тус сэтгүүл онцолжээ. Гэхдээ элсэн чихэр, цөцгий агуулаагүй хар кофе уух хэрэгтэй гэдгийг анхаарах хэрэгтэй юм шүү.
МӨС
Та уух гэж буй усандаа нимбэгний оронд мөс хийгээд үзээрэй. Мөстэй хүйтэн ус уусны дараа хүний бие хэвийн хэмдээ эргэн очихын тулд илүү их энергийг зарцуулах болно. Өдөрт гурван удаа мөстэй ус уух нь нэмэлт 100 калорийг шатаана гэж Kansas City Royals бейсболын багийн хоол тэжээлийн мэргэжилтэн, алдарт “The Pinterest Diet” номын зохиолч Митзи Дулан ярьсан байна. Мөн хэрэв та өдөр бүр мөстэй ус ууж заншвал нэг жилийн хугацаанд 4,5 кг жин хасаж чадна гэж тэр онцолсон юм.
НОГООН ЦАЙ
Антиоксидантаар баялаг ногоон цай нь асар бага илчлэг агуулахын зэрэгцээ өөх шатаах үйл явцыг түргэсгэдэг. Journal of the American College of Nutrition сэтгүүлийн нэгэн судалгаанд хоёр сарын турш өдөрт дөрвөн аяга ногоон цай ууж байсан хүмүүс, цэвэр ус ууж байсан хүмүүсээс 2,7 кг жин илүү хассан нь тогтоогдсон юм. Мөн European Journal of Nutrition сэтгүүлийн 2013 онд нийтэлсэн судалгаанд ногоон цай тогтмол уудаг хүмүүс бусадтай харьцуулбал илүүдэл жингүй байсан нь батлагдсан байдаг. Women’s Health сэтгүүл шинэхэн хандалсан, сайн чанарын ногоон цай сонгохыг зөвлөж байна. Учир нь дэлгүүрт борлуулагдаж буй лонхтой ногоон цайнууд элсэн чихэртэй байхаас гадна, антиоксидантын хэмжээ нь бага байдаг аж.