Твиттерийг өнгөрсөн долоо хоногт худалдаж авсан Илон Маск тус компанийн үйлчилгээний бодлогыг өөрчлөх ажилдаа оржээ. Түүний ажилчиддаа өгсөн эхний даалгавар нь Твиттерийн төлбөртэй хэрэглэгчийн статусыг өөрчлөх тухай байсныг эх сурвалжууд мэдээлж байна.
Одоогоор Твиттерийн хэрэглэгчид өөрийгөө мөн болохыг баталгаажуулаад “хөх” таних тэмдгийг эзэмшдэг. Бас нэмэлт боломжуудыг ашиглах эрх бүхий сарын $4.99 хураамжтай төлбөртэй үйлчилгээний ангилал байдаг. Тэгвэл Илон Маск энэ хоёр боломжийг нэгтгээд сарын $19.99-ын хураамжтай үйлчилгээний ангилал гаргах даалгаврыг ажилтнууддаа өгсөн байна.
Өөрөөр хэлбэл өөрийгөө мөн болохыг баталгаажуулсан тэмдгийг эзэмшиж, өөр бусад нэмэлт боломжуудыг давуу эрхтэй эзэмшихийн тулд сар бүр ийм хэмжээний мөнгө төлдөг болох ажээ.