Монголын сагсан бөмбөгч Шаравжамцын Энхийн-Одын тоглодог Osceola Magic баг 2026–2027 оны улирлын эхний дөрвөн тоглолтдоо дараалан хожиж, 89.6 хамгаалалтын үнэлгээгээр NBA G League-д нэгдүгээрт бичигдэж байна.
Osceola Magic эхний дөрвөн тоглолтод өрсөлдөгчдөө дунджаар 90.0 оноо алдаж, нэг тоглолтод 16.0 удаа бөмбөг тасалжээ. Мөн өрсөлдөгчид нь тоглолт бүрд дунджаар 26.8 удаа бөмбөг алдсан байна. Тус баг эдгээр гурван үзүүлэлтээр мөн лигээ тэргүүлж буй юм.
Улирлын нээлтийн тоглолтод Osceola Magic Oklahoma City Blue-г 97:89-өөр хожихдоо 23 удаа бөмбөг тасалж, багийн дээд амжилтыг шинэчилсэн. Мэргэжлийн анхны тоглолтоо хийсэн Ш.Энхийн-Од 24 минут тоглож, хоёр удаа бөмбөг тасалсан бөгөөд түүнийг талбайд байх хугацаанд Osceola өрсөлдөгчөөсөө 12 оноогоор илүү авчээ. Тэрбээр Mexico City Capitanes-ийг 109:94-өөр хожсон гурав дахь тоглолтод 14 оноо авсны 12-ыг гурван онооны шидэлтээр бүрдүүлсэн юм.
89.6 гэдэг нь юу гэсэн үг вэ?
Хамгаалалтын үнэлгээ буюу Defensive Rating (DRtg) нь өрсөлдөгчийн 100 бөмбөг эзэмшилт тутамд алдсан оноог хэмждэг. Ийнхүү ижил тооны бөмбөг эзэмшилтэд шилжүүлснээр өөр өөр хэмнэлээр тоглодог багуудын хамгаалалтыг харьцуулж болдог. Үзүүлэлт бага байх тусам хамгаалалт үр ашигтай гэсэн үг. NBA-ийн статистикийн тайлбар
