Германы нэрт загвар зохион бүтээгч агсан Карл Лагерфельдийн Франц улс дахь амьдарч байсан тансаг харшийг худалдахаар болжээ. тус харш нь Парисаас холгүй байрладаг ба долоон унтлагын өрөөтэй, нийт 500 м² талбайтай аж. Үл хөдлөх хөрөнгийн зуучлагчийн мэдээлснээр түүний байшин өнөөдрийг хүртэл анхны тансаг хийц, байдлаа хадгалсан хэвээр байгөө бөгөөд ердөө 2.7 сая еврогоор үнэлсэн нь үнэ цэнтэй хувийн харшийн хувьд маш хямд гэдгийг онцолжээ.
Харшийг анх 1749 онд нэгэн сурвалжит гэр бүлд зориулан барьсан бөгөөд 1930-аад оны үед Францын кино жүжигчин Рэнэ Сэн-Сир амьдарч байжээ.
Францын кино жүжигчин Рэнэ Сэн-Сир
Харшийн эзэмшлийн түүхэнд мөн онцлох нэрс бий. Карл Лагерфельд 1998 он хүртэл бараг 10 жилийн хугацаанд уг байшинд амьдарч, тухайн үед Chanel брэндийн зураг авалтыг хүртэл зохион байгуулж байжээ. Түүний дараа Монакогийн гүнж Каролина гэр бүлийн хамт зургаан жил амьдарч байсан.
Монакогийн гүнж Каролинын гэр бүл
Мөн Монакогийн хааны гэр бүлийн гишүүн, соёл, загварын ертөнцөд нөлөө бүхий орчин үеийн эмэгтэйчүүдийн нэг Шарлотт Казирагиийн бага насандаа байшингийн ханан дээр зурсан зургууд болон зарим урлагийн бүтээлүүд одоо ч хадгалагдан үлджээ.
Шарлотт Казираги (Charlotte Casiraghi)
Одоогийн эзэмшигч нь 2014 онд уг харшийг Монакогийн гүнж Каролинагаас худалдан авсан ч нэрээ нууцлахыг хүссэн байна.
Патрик Маурьес “Karl Lagerfeld: A Life in Houses” номдоо түүнийг нэг хэв маягт баригддаггүй, үргэлж шинэ орон зай эрэлхийлдэг хүн байсан хэмээн тодорхойлсон байдаг. Лагерфельд өөрөө ч “Хамгийн сайхан байшин бол хэзээд дараагийн шинэ байшин байдаг” хэмээн хэлж байжээ.
