Трампын засаг захиргаа 75 улсын иргэдэд АНУ-ын цагаачлалын виз олгохыг тодорхойгүй хугацаагаар зогсоох шийдвэр гаргажээ. Тус арга хэмжээ 2026 оны нэгдүгээр сарын 21-нээс хэрэгжих юм.
Төрийн департаментын тайлбараар, энэхүү шийдвэр нь “нийгмийн халамж, тэтгэмжийг ашиглан Америкийн ард түмний баялгийг авах гэсэн иргэдийг зогсоох” зорилготой бөгөөд АНУ-д цагаачлахаар ирэх хүмүүс улс орны нөөц, баялагт дарамт учруулахгүй гэдгээ тодорхой болгож чадах хүртэл цагаачлалын виз олгохгүй хэвээр байх аж.
Энэхүү түр зогсолт нь байнгын оршин суух зорилготой цагаачлалын визүүдэд хамаарах бөгөөд аялал, бизнес, суралцах зэрэг түр хугацааны (non-immigrant) визүүд хэвийн үргэлжилнэ гэж албаныхан мэдэгдсэн юм.
Одоогоор хамрагдах 75 улсын албан ёсны жагсаалтыг нийтэд зарлаагүй байна. Гэхдээ АНУ-ын Fox News болон Reuters агентлагийн мэдээлснээр, урьдчилсан жагсаалтад багтсан улсуудын дунд Монгол Улс байгаа гэсэн мэдээлэл байна.
Трампын засаг захиргаа ерөнхийлөгчийн албанд орсноосоо хойш хууль бус болон хууль ёсны нэвтрэлтийг аль алиныг нь хязгаарлах бодлого баримталж, зарим улс орны иргэдэд олгох визийн үйл явцыг аль хэдийн зогсоогоод байгаа. Мөн хэвлэлүүдийн мэдээлснээр, түүний засаг захиргаа сүүлийн хугацаанд 100 мянга гаруй визийг хүчингүй болгож, АНУ-аас 605 мянга гаруй хүнийг албадан гаргасан тухай Дотоодын аюулгүй байдлын яам мэдээлжээ.
Эх сурвалж: The Guardian, Reuters, Al Jazeera, ABC News
