Алдарт зураач Винсент ван Гогийн “Цэцэглэж буй хүрэн модод” (Châtaigniers en fleurs) бүтээл 2026 оны арваннэгдүгээр сарын 18-нд Нью-Йорк хотод болсон Sotheby’s-ийн дуудлага худалдаагаар 190 сая 430 мянган ам.доллароор зарагджээ. Энэ нь Ван Гогийн бүтээл дуудлага худалдаагаар зарагдсан хамгийн өндөр үнэ юм.
Уг бүтээлийг 180 сая ам.долларт хүрнэ гэж урьдчилан тооцоолж байв. Ван Гогийн өмнөх дээд амжилтыг “Кипарис модтой жимсний цэцэрлэг” (Verger avec cyprès) бүтээл 2022 онд Christie’s-ийн дуудлага худалдаагаар 117.2 сая ам.доллароор зарагдахдаа тогтоож байжээ. Шинэ үнэ өмнөх дээд амжилтаас 73.2 сая ам.доллароордавсан байна.

Ван Гог уг зургийг 1890 оны тавдугаар сарын 24-нд Францын Овер-сюр-Уаз хотод, амьдралынхаа сүүлийн саруудад зуржээ. Тэрээр тус хотод ирснийхээ дараахан цэцэглэж буй хүрэн моддоос санаа авч хэд хэдэн байгалийн зураг бүтээсний нэг нь энэ юм. Уг бүтээлийг 70 × 58 см хэмжээтэй зотон дээр тосон будгаар зурсан байна.
Дуудлага худалдааны өмнө бүтээлийн өмчлөлийн түүхтэй холбоотой маргаан гарчээ. Уг зураг еврей гаралтай Фишерийн гэр бүлийн эзэмшилд байсан бөгөөд 1936 онд нацистын дэглэмийн үед зарагдсан байна. Фишерийн өв залгамжлагчдын өмгөөлөгч тухайн худалдаа шахалт дор хийгдсэн эсэхийг тодруулах хүртэл дуудлага худалдааг хойшлуулахыг хүсжээ. Улмаар Фишерийн өв залгамжлагчид болон зургийг 1975 оноос эзэмшсэн Блакьер–Арриетагийн гэр бүл тохиролцоонд хүрч, худалдаа товлосон ёсоор болсон байна. Тохиролцооны нөхцөлийг нийтэд мэдээлээгүй.
