Бага насны хүүхдийн дархлааг хэрхэн дэмжих вэ? гэдэг бол өвлийн улиралд ээж аавуудын санааг зовоосон асуудлын нэг юм.
Нярай хүүхдийн дархлааны систем тогтолцоо эхийн хэвлийд байхдаа анх үүсэж эхэлдэг ба төрөх үед бүрэн гүйцэд хөгжлийг олоогүйн улмаас хүүхэд гадаад орчны нөлөө, урвалд маш цочимхой, өвчлөмтгий байдаг байна. Улмаар хүүхдийн дархлааны тогтолцоо аажимдаа бүрэлдэн тогтсоноор 5-7 насанд гүйцэд хөгжлийг олдог гэж үздэг. Бага насны хүүхдийг өвчлүүлэхгүй байх, дархлааны системийг нь хэвийн ажиллуулахын тулд эцэг эхчүүд асран хамгаалагчид маш анхааралтай байх хэрэгтэй. Үүний тулд дараах зөвлөмжүүдийг баримтлаарай.
Эхийн сүүгээр хооллох
Хүүхэд ээжээсээ дөнгөж төрмөгцөө ангир уургаа амласан цагаас эхлээд эхийн сүүгээр тэжээгддэг. Эхийн сүү бол маш тогтмол найрлагатай, тухайн хүүхдэд зориулсан хүүхдийн өсөлт бойжилтод шаардлагатай бүхий л хүнсний шимт бодисууд, минерал аминдэмээр маш баялаг байдаг.
Нар, ус, агаараар чийрэгжүүлэх
Хүн өөрөө байгалийн бүтээгдэхүүн. Тиймээс байгаль эхийн хүнийг эрүүл байлгадаг өгөгдлүүдийг эрүүл мэндийнхээ төлөө ашиглах нь уламжлагдан ирсэн үр дүнтэй аргуудын нэг юм.
Асаргаа сувилгаа
Хүүхдэд асаргаа сувилгаа маш чухал. Шинээр төрж буй хүүхдэдээ тусгай булан, өрөө гаргаж, хүүхдийн ор, цагаан хэрэглэл бүхий л зүйлс нь тухайн хүүхдэд зориулсан ариун цэврийг дээд зэргээр сахидаг. Мөн томуу томуу төст өвчлөл туссан үедээ нярайн өрөөнд орохгүй байж хүүхдийг өрөөг ариун байлгах талаас ялангуяа эхний эхний 2 сарын хугацаанд маш сайн анхаарах хэрэгтэй.
Нэмэгдэл хоолонд оруулах
Хүүхдийг 6 сар хүрмэгц нэмэгдэл хоолонд оруулж дасгах хэрэгтэй. Хүүхдэдээ нэмэлт хоол бэлтгэж өгөхдөө хүүхдэд хэрэгцээт аминдэмүүд агуулсан нэмэгдэл хоолонд оруулах нь чухал. Гэхдээ нэмэгдэл хоол өгч буй үедээ хүүхдээ хөхнөөс гаргахгүй байх нь зүйтэй.
Товлолт вакцинуудад хамруулах
Хүүхдийг вакцинжуулах нь тэднийг ноцтой халдварт өвчлөлүүдээс хамгаалах хамгийн найдвартай бөгөөд үр дүнтэй арга юм. Энэхүү товлолт вакцинд хамрагдаж чадаагүйгээс болж дэлхий даяар 20 секунд тутамд бага насны нэг хүүхэд энддэг гэсэн тооцоог Дэлхийн эрүүл мэндийн байгууллага гаргасан байна.
Эдгээр аргуудыг хэрэглэж, хэвших нь хүүхдийн дархлаа зөв өсөж хөгжихөд чухал ач холбогдолтой. Хэрэв хүүхэд томуу болон томуу төст өвчлөлөөр өвдөөд байвал дархлааны систем нь бүрэн гүйцэт хөгжиж чадахгүй тиймээс аль болох хүүхдээ өвчлүүлэхгүй эхийн сүү болон нэмэлт хоолоо зөв зохистой өгөх, зөв асаргаа сувилгаа хийх нь чухал билээ.
