Японы автомашин үйлдвэрлэгч Toyota Motor Corp. 2025 оны дөрөвдүгээр сараас есдүгээр сарын хоорондын санхүүгийн тайлангаа лхагва гарагт нийтэлжээ. Тайланд дурдсанаар тус хугацаанд компанийн ашиг өнгөрсөн жилийн мөн үеэс 7 хувиар буурсан байна. Үүнд АНУ-ын Ерөнхийлөгч Дональд Трампын хэрэгжүүлж буй импортын өндөр тарифууд голлон нөлөөлжээ.
Toyota-ийн цэвэр ашиг уг хугацаанд 1.77 их наяд иен (ойролцоогоор 11.5 тэрбум ам.доллар) болж, өнгөрсөн жилийн 1.9 их наяд иенээс буурсан байна. Гэсэн хэдий ч Camry седан болон Lexus брэндийн автомашин үйлдвэрлэгч тус компани 2026 оны гуравдугаар сард дуусах санхүүгийн жилийн ашгийн таамгаа нэмэгдүүлжээ. Шинэ таамгаар цэвэр ашиг 2.93 их наяд иен (ойролцоогоор 19 тэрбум ам.доллар) хүрэх төлөвтэй байгаа бөгөөд энэ нь өмнөх таамаг болох 2.66 их наяд иенээс өссөн үзүүлэлт юм. Гэсэн ч уг дүн нь өнгөрсөн санхүүгийн жилд бүртгэгдсэн 4.77 их наяд иений ашгаас 38.5 хувиар буурах үзүүлэлт хэвээр байна.
АНУ-ын импортын татвар автомашин, сэлбэг хэрэгсэлд есдүгээр сард 27.5 хувиас 15 хувь болгон буурсан ч энэ нь анхны 2.5 хувийн түвшнээс хамаагүй өндөр хэвээр байна. Эдгээр тарифийн нөлөөгөөр Японы АНУ руу хийж буй экспорт, тэр дундаа автомашины экспорт огцом буурчээ. Гэсэн хэдий ч Toyota компанийн зүгээс борлуулалтын өсөлт, бүтээгдэхүүний бүтцийн сайжруулалт, зардлын бууралт зэрэг хүчин зүйлс нь энэ оны ашигт 900 тэрбум иен (ойролцоогоор 5.8 тэрбум ам.доллар)-ийн нэмэлт үр ашиг авчирна гэж мэдэгджээ.
“АНУ-ын тарифийн сөрөг нөлөөлөл байгаа ч бид борлуулалтын хэмжээг нэмэгдүүлэх, зардлыг бууруулах, үнэ цэнийн сүлжээний ашгийг өргөжүүлэх чиглэлд үргэлжлүүлэн ажиллаж байна” хэмээн тус компанийн мэдэгдэлд дурджээ.
