18 каратын цэвэр алтаар хийгдсэн суултуурыг Сотбигийн дуудлага худалдаанд оруулахаар төлөвлөжээ. Дэлхий даяар алдаршсан, Итали уран бүтээлч Маурицио Каттеланы “America” хэмээх уг уран бүтээл дахин олон нийтийн анхаарлын төвд орж байна.
220 фунт жинтэй, 18 каратын цэвэр алтаар хийгдсэн энэхүү бүтээл 2016 онд Нью-Йоркийн Гуггенхайм музейд анх дэлгэгдэж, 100 мянга гаруй үзэгч татаж байв. Гэвч 2019 онд Английн Бленхейм ордноос зэвсэглэсэн этгээдүүд уг бүтээлийг ердөө тавхан минутын дотор хулгайлсан юм. Хулгайчид энэ онд ял авч, хэрэг эцэслэсэн ч, суултуур өнөөг хүртэл олдоогүй байна. Мөрдөгчид бүтээлийг хайлуулж борлуулсан байх магадлал өндөр гэж үзэж байгаа аж.
Каттелан энэ бүтээлийг анхнаасаа олон хувь гаргах төлөвлөгөөтэй байсан бөгөөд түүний хоёр дахь хувилбар ирэх сард анх удаа урлагийн зах зээлд худалдаалагдах гэж байна. Сотбигийн дуудлага худалдааны ордон уг бүтээлийг 11-р сарын 18-нд Нью-Йоркт борлуулах бөгөөд эхлэх үнэ ойролцоогоор 10 сая ам.доллар байхаар тооцоолжээ.
Сотбигийн мэдээлснээр, уг бүтээл 2017 оноос хойш нэрээ нууцалсан хувийн цуглуулагчийн эзэмшилд байсан бөгөөд дуудлага худалдааны өмнө бүтээлийг тус ордны шинэ байрны ариун цэврийн өрөөнд 10 хоногийн турш түр дэлгэн үзүүлэх аж.
Сотбигийн зүгээс “America” бүтээлийн энэ хувилбар нь одоо бодитоор оршин буй цорын ганц хувь байж болзошгүй хэмээн мэдэгдээд буй. Учир нь анх гурван хувь гаргах төлөвлөгөөтэй байсан ч гурав дахь нь хийгдээгүй гэж үздэгтэй холбоотой.
