Монгол Улсын Зам, тээврийн яам Дэлхийн банктай хамтран автозамын салбарын дотоодын аж ахуйн нэгжүүдэд зориулсан “Сайн чанарын тендерийн материал хэрхэн бэлдэх вэ?” сэдэвт семинарыг өнөөдөр /2025.11.04/ зохион байгууллаа. Үүнд Дэлхийн банкны санхүүжилттэй төслүүдийн худалдан авах ажиллагаанд оролцох автозамын гүйцэтгэгч байгууллагуудын тендерийн баримт бичиг бүрдүүлдэг 50 оролцогч хамрагдав.
Энэхүү семинарыг зохион байгуулснаар Монгол Улсын дэд бүтцийн чанарыг сайжруулах, орчин үеийн гэрээний аргачлалыг нэвтрүүлэх, үндэсний зам, дэд бүтцийн гүйцэтгэгч байгууллагуудын чадавхыг бэхжүүлж байгаа хэмээн экспертүүд онцолж байлаа. Өөрөөр хэлбэл, тус семинараар тендерийн баримт бичгийг нарийвчлан судлах, шаардлагыг бүрэн хангах, холбогдох туршлагаа оновчтой илэрхийлэх, үнийн санал болон хугацааг үнэн зөв тооцох, мөн тендерийн материалыг үр дүнтэй боловсруулан зохион байгуулах зэрэг чадварт суралцав.
Семинарт Дэлхийн банкны Худалдан авалтын ахлах мэргэжилтэн Нурбек Курманалиев тэргүүтэй төлөөлөгчид лекц тавьсан бөгөөд Дэлхийн банкны санхүүжилт бүхий төслийн тендер шалгаруулалтад оролцохдоо хэрхэн, юунд анхаарах ёстойг мэдэж авсан юм. Төгсгөлд нь Дэлхийн банкны Худалдан авах ажиллагаа хариуцсан мэргэжилтнүүдээс асуулт асууж, тодорхой асуултанд хариулт авлаа.
Улмаар энэхүү арга хэмжээ нь Монгол Улсын автозамын дотоодын бизнес эрхлэгчид, аж ахуйн нэгжүүд, Дэлхийн банкны санхүүжүүлсэн төслүүдийн хоорондын харилцааг шинэ түвшинд хүргэх зорилготой бөгөөд бизнесийн оролцоог нэмэгдүүлэх, оролцогчдод олон улсын зах зээлд нэвтрэх гарцыг нээж өгөх, худалдан авалтын үйл явцыг тодорхой болгох, мөн байгууллагууд хоорондын харилцаа, ойлголтыг гүнзгийрүүлэх чухал алхам юм гэдгийг цохон тэмдэглэлээ.
Дэлхийн банкны төлөөлөгч хэлэхдээ “Дэлхийн банк шударга, ил тод байдлыг урт хугацааны нөлөө болгохыг мөрдөж ажилладаг. Зөвхөн хамгийн бага дүнтэй тендерийг сонгохоосоо илүүтэй үнэ цэнийг нь харж төслүүдээ сонгодог. Бид дэд бүтцийн төслүүд, үүний дотор эрчим хүч, зам тээвэр, хот байгуулалтын төслүүдтэй хамтарч ажилладаг. Энэ семинарын хүрээнд эдгээр төслийн боломжийн талаар хуваалцаж, мэдээлэл хүргэлээ. Ингэснээр та бүхэнд өрсөлдөөнт сонгон шалгаруулалтад оролцоход дэмжлэг болно. Дотоодын бизнесийн байгуулагуудад боломжийн талаар илүү мэдээлэл өгч, ярилцлаа” хэмээн онцлов.
