Нойргүйдэл гэдэг нь унтах ёстой цагтаа унтаж чадахгүй байх, нойрсох хугацаа багасах, унтсан ч амарч чадахгүй байх процессыг хэлдэг. Ажлын хэт их ачаалал, стресс, сэтгэл гутрал зэрэг олон шалтгааны улмаас нойргүйдэл үүсэх боломжтой. Мэдээж нойроо хангалттай аваагүйн улмаас ажлын бүтээмж багасаж, уур уцаартай болох, эргэн тойрондоо ч сөрөг уур амьсгал бий болгох талтай. Тэгвэл нойргүйдэлтэй тэмцэх энгийн аргуудаас хуваалцахаар бэлтгэлээ.
1.Гар утас компьютер зэргээ өөрөөсөө хол байлгах
Нойр хүрэхгүй үедээ зурагт үзэж, гар утсаа оролдох нь таны тархийг улам ажиллуулж, унтах хүслийг бууруулдаг. Тиймээс орондоо орохоосоо өмнө интернет болон зурагтаа салгаж нам гүн, тайван орчинг бүрдүүлээрэй.
2.Унтахаас өмнө кофеноос татгалзах
Бид кофе болон кофеин агуулсан бүтээгдэхүүнүүд нойргүйдлийн эх үүсвэр гэдгийг мэддэг ч хэрэглэхгүй байж чаддаггүй. Тиймээс өөрийгөө бодоод унтахаасаа хоёр цагийн өмнө кофений төрлийн зүйл бүү уухаас татгалзаарай.
3.Гэрлүүдээ унтраах
Бид өдөржин гадаа хурц гэрэлд байхаас гадна маш олон төрлийн гэрлийг өдрийн турш хардаг. Тиймээс унтахдаа энэ бүх гэрлээс ангижирч харанхуй орчинг бүрдүүлээрэй. Ингэснээр илүү гүн нойрсох нөхцөл бүрддэг.
4.Тогтмол цагт унтах
Тогтсон цагт орондоо орох нь таныг дотоод цагийн хуваарьтай байлгадаг. Хатуу хуваарь мэт санагдах боловч таны нойронд ач тустай гэдгийг бүү мартаарай.