УИХ-ын гишүүн Х.Тэмүүжин “Хоёр жилийн өмнө төсвийг хэрхэн зарцуулсан талаар олон гишүүд зарчмын байр суурь илэрхийлж, шүүмжлэлтэй хандаж байна.
Нэгт, энэ төсвийн гүйцэтгэлийг хаврын чуулганаар хэлэлцэх ёстой байсан. Ийм шуурхай, ээлжит бус чуулганаар хэлэлцэх ёстой байсан уу, үгүй юу гэдэг дээр эргэлзээ төрж байна.
Хоёрт, гишүүдийн ярьж байгаагаар 2023 оны төсвийн гүйцэтгэлийн тайлан чинь гэмт хэргийн хавтаст хэрэг шиг юм болчихсон байна. Гэмт хэргийн шинжтэй, зөрчлийн шинжтэй маш олон үйлдэл, баримт яригдаж байна. Олноороо нийлээд яаж үрэлгэн, замбараагүй, хувийн ашиг сонирхолоор зардаг юм бэ гэдэг асуудал яригдаж байна. Дээд, доодгүй оролцсон дүр зураг харагдлаа.
Тийм учраас Ардчилсан намын бүлэг энэ төсвийн гүйцэтгэлтэй холбоотой асуудал дээр УИХ Ажлын хэсэг гаргах ёстой гэж үзэж байна. Хариуцлага ярих ёстой сэдвүүд хөндөгдөж байгаа учраас Намрын чуулганаар энэ асуудлыг эцэслэх хэрэгтэй.
Хамтарсан Засгийн газрын өнгөн дээр ийм зүйлийг өөгшүүлж болохгүй. Үнэхээр хариуцлагын асуудал ярья гэж байгаа бол одоо энэ тогтоолын төслийг батлахгүйгээр Намрын чуулган руу шилжүүлэх хэрэгтэй.
Ажлын хэсгийнхээ дүгнэлтийг гаргаж, ярьж хэлэлцээд хариуцлага тооцъё. Хариуцлагаа сайжруулах, төсвийг илүү үр ашигтай байлгах чиглэлээр арга хэмжээ авах ёстой бол энэ тогтоол дотор тэр бүхэн чинь бичигдэж орох ёстой.
Тэгэхгүй бол “нүглийн нүдийг гурилаар хуурна” гэдэг шиг яаруу сандруу, ажил хэрэгч бус зүйл болох нь.
Г.Дамдинням, Х.Ганхуяг, Б.Энхбаяр гишүүний санаачлагыг дэмжиж байна. Гэхдээ хаягалсан эзэн чинь буруу байна. Одоо байгаа Засгийн газрын асуудал биш, энэ хоёр жилийн өмнөх Засгийн газрын асуудал шүү!” гэв.
