БШУЯ, GUYUK метаверс хамтран боловсролын экспог Монголдоо анх удаа виртуал орчинд зохион байгуулж байна. Уг үзэсгэлэн 2023 оны 4 дүгээр сарын 27-ноос 5 дугаар сарын 31-ны хооронд үргэлжлэх юм. Энэхүү экспод оролцсоноор ЭЕШ өгөхөд анхаарах зөвлөгөө мэдээлэл, Япон, БНСУ, АНУ, БНХАУ болон Дубайн шилдэг их, дээд сургуулиудад элсэн суралцах зөвлөгөө, мэргэжил сурталчлах илтгэл хэлэлцүүлэг сонсох, дотоодын их, дээд сургуулиудын мэдээллийг нэг дороос авах, ЭЕШ-д бэлдэх зөвлөгөө мэдээлэл болон хичээл үзэх, ивээн тэтгэгч байгууллагуудын гарын бэлгийн эзэн болох боломжтой гэнэ. Үүний тулд та гар утас, компьютер, зөөврийн нөүтбүүк, таблет зэрэг өөрийн ашигладаг төхөөрөмж дээрээ GUYUK метаверс аппликейшнийг татаж авахад хангалттай юм. Ингэснээр хүссэн газраасаа үнэ төлбөргүйгээр виртуал эвентэд хамрагдах боломжтой. Та GUYUK метаверс аппликейшнг www.guyuk.mn веб хуудаснаас татаж аваарай.
GUYUK метаверс нь виртуал ертөнцөд суурилсан нийгмийн сүлжээ бөгөөд түүх өв соёл, боловсролын чиглэлээр үйл ажиллагаа эрхлэн явуулдаг. Тус платформ 2022 оны 9 дүгээр сарын 30-нд эхний хувилбараа хэрэглэгчдэд танилцуулж, энэ хугацаанд 20 мянга гаруй бүртгэлтэй хэрэглэгчтэй болжээ. Та бүхэн боловсролын экспотой холбоотой хөтөлбөрийн дэлгэрэнгүй мэдээллийг GUYUK Metaverse фэйсбүүк хуудаснаас авах боломжтой.
