Утаагаа багасгахын тулд жил бүр тодорхой хэмжээний ажлыг хэрэгжүүлж, төсвөөс их хэмжээний хөрөнгийг зарлагаддаг ч үр дүнд хүрэхгүй байгаа гэдэг нь бидний нүдэнд ил харагдаж байна. Хоолой хорсгож, үс хувцсанд нэвт шингэсэн хорт утааг багасгах нь хүн бүрийн хүслийн томоохон хэсэг болжээ.
Улаанбаатар хот болон 21 аймгийн төвийн агаарын бохирдлыг хүхрийн давхар исэл, азотын давхар исэл хоёроор хэмждэг.
Агаарын бохирдол нь хүн амын эрүүл мэндэд сөргөөр нөлөөлж амьсгалын замын, зүрх судасны, төв мэдрэлийн cистемийн өвчлөл, харшлын өвчнүүд, удамшлын эмгэг, төрөлхийн гажиг, хавдар зэрэг өвчнүүдийн тархалт, тохиолдлын түвшнийг ихэсгэх, улмаар нөхөн үржихүйн эрүүл мэндийг хордуулах, хүүхдийн дархлаа, өсөлт хөгжлийг бууруулах нөлөөтэй байдгийг эрдэмтэд, судлаачдын хийсэн судалгаанаас харах боломжтой.
Цаашлаад агаарын бохирдол нь хүний сэтгэл зүйд нөлөөлдөг төдийгүй нэг сарын турш нарийн ширхэгт тоосонцорт өртөх нь амиа хорлох оролдлогыг 50 хувиар нэмэгдүүлдэг болохыг Massachusetts Institute of Technology-ийн судлаачид тогтоожээ.
