Сүүлийн үед инстаграм хэрэглэгчдийн тоо хурдтайгаар өсөж байгаа билээ. Үүнийг дагаад хүмүүсийн инстаграмд өнгөрүүлэх цаг хүртэл уртассаар байна. Магадгүй энэ нь зөвхөн зураг нийтлэхээсээ илүү олон сонирхолтой контентуудыг хүргэдэг болсонтой холбоотой. Тэгвэл арьс арчилгаа, хоол, загвар, эрүүл мэнд зэрэг сонирхолтой сэдвүүдээр хөтөлдөг инстаграм хаягуудыг хуваалцъя.
1.erdenebulgan_photographer
Эхний санал болгох хаяг бол erdenebulgan_photographer юм. Тэрбээр Монгол орныхоо бахдам сайхан дүр зургийг камерт буулгаж, олон хүний нүд сэтгэлийг баясгадаг зурагчин. Түүний инстаграмаар зочилбол эх орноо илүү гоёор харна гэдэгт итгэлтэй байна.
2.homdvv
Заримдаа ямар хоол хийхээ мэдэхгүй үе танд тохиолддог уу? Тэгвэл энэ хаяг тэрхүү асуултад тань хариулж болох юм. Учир нь гэртээ хийж идэхэд тохиромжтой маш олон төрлийн хоолны жор болон хийх аргыг хуваалцдаг. Урт, сунжирсан бичлэг үзэхэд хэцүү байдаг хүмүүс энэ хаягийг дагаад үзээрэй.
3. aranjinnn
Ихэнх хүмүүс гоё сайхан хувцаслахыг хүсдэг ч хаанаас яаж эхлэхээ мэддэггүй. Түүнээс гадна хүн бүрд хувьдаа стилист авах цаг хугацаа, мөнгө ховор байдаг. Тэгвэл энэхүү хаяг танд хэрхэн өөрт тохирсон хувцсаа сонгоход тань тусалж чадна гэдэгт итгэлтэй байна. Мөн ухаалаг хувцасны шүүгээ бүрдүүлснээр дэмий зарлага гаргахгүй байх боломжтой гэнэ дээ.
4.coco_batbuyan
Бүгд л арьсандаа таарч, тохирсон бүтээгдэхүүн хэрэглэхийг хүсдэг. Гэвч олон мянган гоо сайхны бүтээгдэхүүнээс зөвийг нь сонгоно гэдэг өвсөн дундаас зүү хайхтай ижил гэхэд хилсдэхгүй. Харин энэхүү хаягийг дагавал ядаж л ямар арьсанд ямар орцтой бүтээгдэхүүн тохирдог гэдгийг мэдэх боломжтой. Гэхдээ мэдээж хүн бүрийн арьс өөр гэдгийг анхаарах хэрэгтэй шүү.
5. sexual.educatio_n
Хүн болгон математикч болох албагүй ч эцэг, эх болдог гэдэг үг бий. Үүний адилаар эрэгтэй, эмэгтэй гэлтгүй бүх хүмүүс бэлгийн боловсролдоо анхаарч энэ талын мэдлэгийг олж авах хэрэгтэй. Үүнд энэхүү хаяг найдвартай зөвлөх болно гэдэгт итгэлтэй байна.
