BLACKPINK хамтлагийн Лиса K-pop одын хувиар туулсан бэрхшээл болон өмнөх хайр дурлалын харилцааныхаа талаар анх удаа илэн далангүй ярьжээ. Тэрбээр бүрэн хэмжээний “Always Lalisa” баримтат кинонд энэ тухай хуваалцсан байна.
Лиса 2011 онд 14 настайдаа БНСУ-д ирж, YG Entertainment-д бэлтгэгдэж эхэлсэн. Тухайн үеэ дурсахдаа тэрбээр өөрийн бодол, үзэл санаагаа чөлөөтэй илэрхийлж чаддаггүй байсан бөгөөд сар бүр бэлтгэл, үзүүлбэрийн бичлэгээ удирдлагууддаа хүргүүлж, үнэлгээ авдаг байснаа ярьжээ. Мөн K-pop салбар дахь болзооны хатуу дүрмийн талаар ярьжээ. Түүний хэлснээр өмнө нь хэд хэдэн удаа болзож байсан ч харилцаагаа олон нийтээс нууцлах шаардлагатай байжээ. Учир нь хувийн харилцаа нь BLACKPINK-ийн нэр хүнд, амжилтад сөргөөр нөлөөлөхөөс эмээдэг байсан аж.
Лиса өнгөрсөн онд гаргасан анхны бие даасан студийн цомог “Alter Ego”-д өөрийн хайр дурлалын бодит түүхээ өгүүлсэн гэдгээ мөн дэлгэжээ. Тухайлбал, цомогт багтсан “Dream” дуу нь түүний өмнө нь олон нийтээс нууцалж байсан нэгэн харилцаанаас сэдэвлэсэн байна.
Сонирхолтой нь Лиса дуугаа гаргахаасаа өмнө тухайн хуучин найз залуутайгаа холбоо барьж, энэ түүхээс сэдэвлэсэн дуугаа нийтлэх зөвшөөрөл хүссэн гэжээ. Харин тэр хүн нэг нөхцөлтэйгөөр зөвшөөрсөн байна. Тэр нь фэнүүд түүний хэн болохыг олж мэдэхгүй байх байжээ.
