Японы загварын долоо хоногийн байгууллагаас зохион байгуулж буй “Rakuten Fashion Week TOKYO 2027 Spring/Summer” арга хэмжээ наймдугаар сарын 31-нд эхэлж, нээлтийн гол үзүүлбэрийг Японы yoshiokuboбрэнд толилууллаа. Тус брэнд энэ улирлын цуглуулгаа “Natural Born Nomads” буюу “Төрөлхийн нүүдэлчид”хэмээн нэрлэж, Шибүяа Хикариэ цогцолборын үзүүлбэрийн танхимын төвд Монголын уламжлалт гэрийг тусгайлан барьсан нь зочдын анхаарлыг татжээ.
Шинэ цуглуулга нь тус брэндийн 2026 оны намар, өвлийн улиралд дэвшүүлсэн “Хотын гүйгчид” санааг үргэлжлүүлж, орчин үеийн хотын амьдрал дахь чөлөөт хөдөлгөөн болон нүүдэлчний хүлээсгүй сэтгэлгээг хувцасны загвараар илэрхийлсэн байна. Дизайнер Ёшио Кубо Лос-Анжелес хотын эргээр хөнгөн, ямар ч хүч гаргалгүй гүйж буй залууг хараад нүүдэлчний эрх чөлөөт мөн чанарыг мэдэрсэн нь шинэ цуглуулгын санаа болжээ.
Үзүүлбэрт өдөр тутам өмсөх боломжтой атлаа нарийн эсгүүртэй, хөнгөн намирсан материал бүхий хувцаснууд багтсан байна. Уяа, түгжээ ашигласан өвөрмөц шийдлүүд нь угсаатны хэв шинжийг санагдуулах боловч аль нэг үндэстний хувцсыг шууд дуурайлгаагүйг зохион байгуулагчид онцолжээ. Дизайнер Ёшио Кубо “Бид нарийн ур хийц шаардлагатай болсон ертөнцөд амьдарч байна гэж боддог” хэмээн цуглуулгынхаа талаар хэлсэн байна.
Шоуны төгсгөлд цагаан цаст тал мэт зассан тайз хар гэрлийн нөлөөгөөр хувирч, неон өнгөөр гэрэлтсэн хөлийн мөрнүүд үзэгдэх болжээ. Дизайнер Кубо ч гэрэлтдэг будгаар нүүрээ будан тайзнаа гарч ирсэн байна. Ийнхүү өөрийн хүсэл зоригийн дагуу эрх чөлөөтэй урагшлах орчин үеийн гүйгчийн дүрээр нүүдэлчин сэтгэлгээг илэрхийлсэн үзүүлбэр Токиогийн загварын долоо хоногийн эхний өдрийн онцлох үйл явдлын нэг болжээ.
Эх сурвалж: Rakuten Fashion Week TOKYO
