Америкийн жүжигчин Сидни Суини спортын бооцооны платформ Novig-ийн шинэ сурталчилгаанд тоглосон нь мэргэжлийн эмэгтэй тамирчдын шүүмжлэлтэй тулгараад байна. Тамирчдын дургүйцлийн гол шалтгаан нь жүжигчин нүцгэн болон хагас нүцгэн дүрслэлд орсонд бус, харин спорттой холбоотой бүтээгдэхүүнийг сурталчлахдаа эмэгтэй хүний биеийг бэлгийн агуулгаар ашигласан явдал гэж тэд тайлбарлажээ.
Сурталчилгаанд Суини теннис, гольф, бейсбол, хоккей зэрэг спортын хэрэгслээр биеийнхээ зарим хэсгийг халхалсан байдлаар гардаг. Үүний дараа Олимпын дөрвөн удаагийн аварга, Австралийн усанд сэлэгч Ариарне Титмус уг сурталчилгааг шүүмжилж, эмэгтэй хүний биеийг мөнгө олох хэрэгсэл болгон ашиглаж, эмэгтэйчүүдийн спортыг бэлгийн агуулгаар сурталчилсаар байгаад бухимдаж буйгаа илэрхийлсэн байна. Тэрбээр эмэгтэй тамирчид ур чадвараа хөгжүүлэхийн тулд олон жил хөдөлмөрлөж байхад ийм төрлийн сурталчилгаа нь тэдний хөдөлмөрийг үл хүндэтгэсэн хэрэг гэж үзжээ.
Түүний байр суурийг бусад мэргэжлийн тамирчин ч дэмжсэн байна. Их Британийн гүйгч Эми Хант тэмцээний дараах ярилцлагынхаа үеэр “Сидни Суини, спорт дахь эмэгтэйчүүд ийм харагддаг” хэмээн хэлж, булчин, шаргуу хөдөлмөр, хөлс, цус, нулимс бол мэргэжлийн спортын бодит дүр төрх гэдгийг онцолжээ. Мөн гимнастикч асан Грейси Крамер өөрийн тэмцээн, бэлтгэлийн бичлэгийг нийтэлж, “эмэгтэй хүн спортод ингэж харагддаг” гэсэн агуулгаар байр сууриа илэрхийлсэн байна. Улмаар усан поло, бокс, дугуй зэрэг спортын бусад эмэгтэй тамирчин ч өөрсдийн бэлтгэл, тэмцээний бичлэгийг цахим орчинд хуваалцаж, шүүмжлэлд нэгдэв.
Шүүмжлэл гаргасан тамирчид эмэгтэй хүн тачаангуй харагдах, биеэ ил гаргахыг буруутгаж байгаа хэрэг биш гэдгээ мөн тодотгожээ. Харин эмэгтэйчүүдийн спорт олон жилийн турш тамирчдыг гадаад төрх, бие галбираар бус ур чадвар, амжилтаар нь үнэлүүлэхийн төлөө хөгжиж ирсэн байхад спортын бүтээгдэхүүн борлуулахдаа эмэгтэй хүний биеийг дахин анхаарал татах хэрэгсэл болгосныг асуудал гэж үзэж байгаа юм.
Суини шүүмжлэлийн дараа Instagram хуудсаараа Серена Уильямс, Ронда Раузи зэрэг алдартай эмэгтэй тамирчид өмнө нь нүцгэн болон хагас нүцгэн зураг авхуулж байсан ESPN The Magazine-ийн “Body Issue” төслийн зургуудыг хуваалцсан байна. Үүнийг зарим хэвлэл одоогийн шүүмжлэлд өгсөн түүний шууд бус хариу хэмээн тайлбарлажээ.
Харин Novig-ийн гүйцэтгэх захирал Жейкоб Фортинскийн мэдээлснээр сурталчилгаа нь 21-ээс дээш насны хэрэглэгчдэд чиглэсэн бөгөөд Суини кампанит ажлын санаа, мессежийг боловсруулахад оролцсон байна. Суини нь тус компанийн сурталчилгааны нүүр царайгаас гадна стратегийн түнш, хувь эзэмшигчээр бүртгэгдсэн талаар The Guardian мэдээлжээ.
