Та шинэ хүмүүстэй танилцах, олны өмнө гарах эсвэл таалагддаг хүнтэйгээ уулзахдаа сандарч, биеэ барих зэрэг үйлдлийг хийдэг үү? Хэдийгээр ичимхий зан хүн болгонд их бага хэмжээгээр байдаг ч энэ зангаа засахыг ихэнх хүмүүс хүсдэг. Тэгвэл ичимхий зангаасаа салахад тань туслах гурван зөвлөгөөг хүргэе.
НЭГДҮГЭЭРТ: ИЧИХ МЭДРЭМЖЭЭ ХҮЛЭЭН ЗӨВШӨӨРӨХ
Айх, сандрах, түгших, эргэлзэх, шаналах, өөртөө итгэхгүй байх гээд бүхий л мэдрэмж, сэтгэл хөдлөлүүдийн адилаар ичих нь ч гэсэн хэвийн гэдгийг хүлээн зөвшөөрөх хэрэгтэй. Аз жаргалтай байх хэвийн бол гунигтай байх ч хэвийн гэсэн үг. Тиймдээ ч ичимхий зангаасаа салахыг хүсвэл эхлээд үүнийгээ хүлээн зөвшөөрөх хэрэгтэй.
ХОЁРДУГААРТ: ӨӨРИЙНХӨӨРӨӨ БАЙХ
Чи, би, бид хорвоо ертөнц дээр цор ганц гэдэг үгийг бишгүй сонсож байсан байх. Гэхдээ энэ магадгүй туйлын үнэн. Тиймээс бусдаас өөрийгөө чөлөөлж аль болох өөрийнхөөрөө байхыг хичээгээрэй. Мэдээж энэ амаргүй байж болох ч оролдсоор байгаарай. Тэр бүү хэл сүүлийн жилүүдэд бидэнд алдартай илтгэгч, хэн нэгэн нөлөөлөгчийн үг бус энгийн, хэнд ч таалагдахыг хичээдэггүй хүмүүсийн хэлсэн үг, илэрхийлэх гэсэн санаа илүү хүрдэг болсон байна.
ГУРАВДУГААРТ: БУСДЫН БОДЛЫГ БУСДАД ҮЛДЭЭ
Ихэнх хүмүүс өөрийн тухтай бүсээсээ гарч, олон хүнтэй харилцаанд орохдоо өөрийг нь буруугаар бодох вий, шүүмжлэх вий, шоолох вий гэх зэргээр бусдын бодолд хэт их ач холбогдол өгдөг. Үүнээсээ болоод сандарч, түгшдэг. Гэхдээ эцсийн дүнд чамайг хэн нэгэн муухайгаар бодлоо гэхэд чи тийм болохгүй гэдгээ л сайн ойлгох хэрэгтэй. Тиймээс бусдын бодлыг бусдад үлдээж сураарай.
