Узбекистаны нийслэл Ташкент хотод болж буй “Ташкент-2026” жүдо бөхийн залуучуудын дэлхийн аварга шалгаруулах тэмцээнд Монголын жүдоч Тэрбишийн Ариунзаяа эмэгтэйчүүдийн 57 кг-ын жинд түрүүлж, алтан медаль хүртлээ.
“Хилчин” спорт хорооны тамирчин, олон улсын хэмжээний мастер, дэд ахлагч Т.Ариунзаяа аваргын төлөөх барилдаанд Киргизстаны Жанар Жолдошеваг цэвэр ялжээ. Тэрбээр хагас шигшээд Азербайжаны Хадижа Гадашоваг буулган авснаар финалд шалгарсан юм.
Өдгөө 18 настай Т.Ариунзаяа 2024 онд Перугийн Лима хотод болсон өсвөр үеийн дэлхийн аварга шалгаруулах тэмцээнд түрүүлж байв. Ташкентын дэвжээнд алтан медаль хүртсэнээр тэрбээр жүдо бөхийн өсвөр үе, залуучуудын ДАШТ-д хоёуланд нь түрүүлсэн Монголын анхны жүдоч боллоо.
