Хөлбөмбөгийн домогт тамирчин Криштиану Роналду анх удаа уран сайхны олон ангит телевизийн цувралд дүр бүтээхээр болжээ.
“Day 1s” нэртэй энэхүү драм цуврал нь хөлбөмбөгийн ертөнцийн ард өрнөдөг тоглогчдын шилжилт, агентуудын өрсөлдөөн, их хэмжээний мөнгө, нэр хүнд, хувийн харилцааны тухай өгүүлэх юм.
Роналду уг төслийн гүйцэтгэх продюсерээр ажиллахын зэрэгцээ өөрөө дүр бүтээх бөгөөд түүний тоглох дүрийг одоогоор нууцалж байна.
Цувралд Kingsman болон X-Men: First Class киноны найруулагч Мэттью Вон, жүжигчин Дамиан Льюис, Францын хөлбөмбөгийн домог Тьерри Анри, Их Британийн реппер Dave нар хамтран ажиллаж байгаа нь уг төслийг олны анхаарлыг татаж байна.
Энэ нь Роналдугийн спортын амжилтаас гадна кино, телевизийн салбарт хийж буй хамгийн том алхамуудын нэг болж буй юм.
