Орчин үе бол мэдээллийн шуурганы эрин үе гэгдэж байна. Бид мэдээ мэдээллийг дэлхийн хаанаас ч, хэзээ ч хамаагүй маш олон сувгуудаар дамжуулан авч чаддаг болсон. Үүнийг дагаад мэдээлэл авах суваг, платформоо ч өөрсдөө сонгох боломжтой болж. Энэ нь маш их давуу тал олгож буй. Учир нь та фэйсбүүкгүй байсан ч өөрийн хамгийн өргөн хэрэглэдэг сошиал платформоо сонгон мэдээллийг цаг алдалгүй авч болж байна шүү дээ.
Гэхдээ бас үүнд сөрөг тал ч бий. Мэдээллийг түргэн шуурхай авч буй ч хэр үнэн бодитой, тэнцвэртэй мэдээлэл вэ гэдэг эргэлзээтэй болсон. Гадаад болон дотоодын олон сувгууд дундаас мэдээллийг шуурхай, эх сурвалжтай, тэнцвэртэй дамжуулдгийг шүүж, тунгааж, олж авах гэдэг амаргүй. Мөн зөвхөн домайн хаяг, фэйсбүүк хуудас үүсгэчхээд бусад газрын мэдээллийг хуулж, буруу ташаа мэдээлэл шүүлтүүргүй тараадаг олон ч сайт, хуудаснууд бий.
Тиймээс энэ удаад залуус та бүхэнд ”Улс төр, Нийгэм”-д өрнөж буй үйл явдлын талаар мэдээлэлдэг, буух эзэн буцах хаягтай гэдэг шиг мэргэжлийн редакцтай, баталгаатай, тэнцвэртэй мэдээ мэдээллийг авч болох сайт, сувгуудийг санал болгож байна.
Нэгдүгээрт: https://ikon.mn/ 2013 оны арваннэгдүгээр сарын 1-ний өдрөөс эхлэн хамгийн сүүлийн үеийн технологи ашигласан, давтагдашгүй, шинэ өнгө төрх бүхий мэдээллийн IKON.mn. Бүх төрлийн төхөөрөмжийн дэлгэцэд тохирсон хэлбэр хийцтэйгээр бүтээгдсэн нь танд мэдээ мэдээллийг хэрэглэхэд илүү эвтэйхэн, хялбар байдаг. Мөн хамгийн түгээмэл ашиглагддаг нийгмийн сүлжээнүүд(Facebook, Twitter)-тэй нягт уялдаж ажилладаг, график дүрслэл бүхий мэдээллээр баялаг зэргээрээ бусдаас давуу талтай. Мөн улс төр, нийгэм, бусад баталгаатай мэдээ мэдээллэлийг цаг алдалгүй авах бүрэн боломжтой.
Хоёрдугаарт: News.MN 2007 онд байгуулагдсан цагаасаа эхлэн техник, технологийн дэвшлийг ашиглан хэрэглэгчдийг үнэн бодит, баталгаат мэдээ мэдээллээр хангасаар ирсэн. Илүү хүртээмжтэй байлгах зорилгоор гар утасны хувилбар, Англи, Монгол бичгээр мэдээгээ байршуулдаг. Хэрэв та сонирхолтой байдлаар уншихыг хүсвэл энэхүү сайт руу зочлоод үзээрэй.
Гуравдугаарт: GoGo.mn Цахим сэтгүүлзүйд шинэ өнгө төрх, шинэ хэрэглээг нэвтрүүлсэн gogo.mn сайтаас та улс төр, нийгэм, эдийн засгийн тодорхой эх сурвалжтай, тэнцвэртэй мэдээллийг авч болох юм. 17 жилийн турш Монголын хамгийн өргөн хэрэглэгдэж буй мэдээллийн сайт юм. Мөн та GOGO булан хэсэг рүү нэвтрэн сонирхолтой мэдээлэл, ярилцлагуудыг уншиж болно.
Дараагийн санал болгож буй мэдээллийн суваг бол илүү шинэлэг сонирхолтой, залуу хүмүүс рүү чиглэсэн, залуучуудын хамгийн их ашигладаг инстаграм дээр мэдээллээ давхар түгээдэг гэдгээрээ давуу талтай. Ингсэнээр та сошиал ухаж байхдаа ч баталгаатай мэдээллийг цаг алдалгүй авах боломжтой гэсэн үг.
Дөрөвдүгээрт “Ноорог” Өнөөгийн залуусын өдөр тутмын хэрэглээ болсон нийгмийн сүлжээ бол инстаграм. Та инстаграмийнхаа хайлт хэсэг дээр noorog.mn гэж бичиж ороод л, өөрт хэрэгтэй мэдээлэл, видео контентуудыг үзэх боломжтой. Хэрэв унших нь танд залхуутай санагддаг бол noorog.mn рүү орж баримтат кино үзэхийг зөвлөе.
Тавдугаарт: “unnu.news” Та мэдээ мэдээллийг илүү шинэлэг, бүтээлч контент, подкаст хэлбэрээр дамжуулан авах хүсэлтэй бол энэхүү сайт танд яг тохирно. Мэдээллийн урсгалд живсэн энэ цаг үед ойлгоход төвөгтэй ч зайлшгүй мэдэх хэрэгтэй олон чухал сэдэв бий. Улс төр, нийгмийн тухай сонирхолтой хийцлэл бүхий, тэнцвэртэй мэдээллийг залуусын сонирхол татахуйц агуулга, өнгө төрх, дизайнтай хүргэдэг.
Мэдээллийг бэлтгэсэн дадлагажигч: Ж. Дариймаа
