Японы шинэ Ерөнхий сайд Санаэ Такаичи Хойд Солонгосын удирдагч Ким Жон Унтай дээд хэмжээний уулзалт хийх хүсэлтэй байгаагаа мэдэгдлээ. Ийнхүү уулзалт хийх санал гаргасан нь өнгөрсөн 20 гаруй жилийн хугацаанд анхных юм.
“Бид Хойд Солонгосын талд дээд хэмжээний уулзалт хийх хүсэлтээ аль хэдийнэ илэрхийлсэн” гэж Такаичи даваа гарагт хэдэн арван жилийн өмнө Хойд Солонгост хулгайлагдсан Японы иргэдийг буцаан авчрахыг шаардсан цуглаан дээр хэлжээ.
Хойд Солонгосын тагнуулчдын үйл ажиллагааны хүрээнд 1970–1980-аад онд дор хаяж 17 япон иргэн хулгайлагдсан гэж мэдэгддэг. Тэднээс тавыг нь 2002 онд буцаан илгээсэн байна. Харин Хойд Солонгос хулгайлагдсан хүмүүсийн тоог няцааж, зарим нь ослоор, живэх эсвэл амиа хорлосон гэж мэдэгдэн, асуудал хаагдсан гэж үздэг.
Такаичи “Удирдагчид нүүр тулан уулзаж, бодит үр дүнд хүрэхийг хүсэж байна. Миний бие бүрэн эрхийнхээ хугацаанд хулгайлагдсан иргэдийн асуудлыг шийдвэрлэхийн төлөө тууштай ажиллана” хэмээн онцолсон.
Хулгайлагдсан хүмүүсийн гэр бүлийнхэн, тэр дундаа хулгайлагдах үедээ өсвөр насныхан байсан иргэдийн ар гэрийнхэн олон жилийн турш хүлээлт, зовлон амссаар ирсэн бөгөөд дараалан солигдсон Японы удирдагчид ч асуудлыг шийдвэрлэхэд амжилт олоогүй билээ. Такаичи албан тушаалдаа орсноосоо хойш эдгээр гэр бүлийнхэнтэй хоёр удаа уулзсан бөгөөд тэдгээрийн нэг нь АНУ-ын Ерөнхийлөгч Дональд Трампын Японд хийсэн айлчлалын үеэр болж байжээ. Тэрээр өөрийн багш, хуучин Ерөнхий сайд Шинзо Абэгийн эхлүүлсэн “иргэдээ буцаан авчрах” зорилгыг хэрэгжүүлэхээ өмнө нь мэдэгдэж байсан юм.
2022 онд алагдсан Ерөнхий сайд асан Шинзо Абэ мөн Ким Жон Унтай уулзалт хийхэд бэлэн байгаагаа илэрхийлж байсан бол дараа нь түүний залгамжлагч Фумио Кишида мөн адил санаачилга гаргасан боловч уулзалт бодит ажил бололгүй өнгөрчээ.
Харин өнгөрөгч 10-р сард Ерөнхий сайдаар томилогдсон Такаичи урьдын адил олон жилийн турш шийдэл олоогүй энэхүү эмзэг асуудлыг өвлөж авч, үүнийг шийдвэрлэх анхны удирдагч болохыг зорьж байна.
