2026 оны 01-р сарын 27-ны өдөр Английн Элчин сайдын яам, НҮБ-ын Хүүхдийн Сан (UNICEF)-гийн хамтарсан үйл ажиллагааг Дундговь аймагт зохион байгууллаа. Тус үйл ажиллагаанд Их Британи Умард Ирландын Нэгдсэн Хаант Улсаас Монгол Улсад суугаа Онц бөгөөд Бүрэн эрхт Элчин Сайд Фиона Блайт, НҮБ-ын Хүүхдийн Сангийн төлөөлөгч Эваристе Коаусси-Комлан нар оролцов.
Томилолтын хүрээнд боловсролын салбар, тэр дундаа англи хэлний сургалтын өнөөгийн байдал, багш нарын мэргэжлийн хөгжил, орон нутгийн сургалтын орчинтой танилцав. Энэ хүрээнд Дэлгэрцогт сумын ЕБС, Сайнцагаан сумын Цэгц билиг сургуульд зочилж, сургуулийн удирдлагуудтай уулзан англи хэлний сургалтын зохион байгуулалт, орчин, багш нарын санал хүсэлтийг сонслоо.
Мөн англи хэлний хичээлийн үйл ажиллагаанд ажиглалт хийж, англи хэлний клубын сурагчидтай уулзан, сурагчдын хэл сурах идэвх, оролцооны талаар ярилцав.
Түүнчлэн аймгийн англи хэлний багш нартай уулзалт зохион байгуулж, “Алслагдсан орон нутгийн англи хэлний багш нарын ур чадварыг нэмэгдүүлэх нь” төслийн II үе шатны хэрэгжилт, үр дүн, цаашдын хамтын ажиллагааны талаар хэлэлцлээ.
Энэхүү үйл ажиллагаа нь Дундговь аймагт англи хэлний сургалтыг хөгжүүлэх, багш нарын мэргэжлийн чадавхыг нэмэгдүүлэх, олон улсын байгууллагуудтай хамтын ажиллагааг бэхжүүлэхэд чухал ач холбогдолтой үйл ажиллагаа боллоо.
