Эрүүл амьдрахыг хүсдэггүй хүн гэж үгүй билээ. Ихэнх нь л зөв хооллоно, дасгал хийнэ, эмчид үзүүлнэ гэж боддог. Гэвч бодит байдал дээр бидний өдөр тутамдаа “хэвийн” гэж боддог зарим зуршил эрүүл мэндэд чимээгүйгээр сөрөг нөлөө үзүүлсээр байдаг. Тэдгээр нь архи, тамхи шиг ил тод аюултай биш учраас анзаарагдахгүй, харин удаан хугацаандаа илүү хор хөнөөлтэй байдаг байна.
1.Удаан хугацаанд суух
Орчин үеийн хүмүүс тэр дундаа оффист ажилладаг хүмүүсийн нэг өдрийн дийлэнх хэсэг сууж өнгөрдөг. Ажлын ширээ, машин, нийтийн тээвэр, орой нь утас, зурагт. Дэлхийн Эрүүл Мэндийн Байгууллагын (WHO) мэдээлснээр удаан хугацаанд суух нь зүрх судасны өвчин, 2-р хэлбэрийн чихрийн шижин, зарим төрлийн хавдрын эрсдэлийг нэмэгдүүлдэг байна. Хамгийн анхаарал татах зүйл нь өдөрт тогтмол дасгал хийдэг байсан ч олон цаг тасралтгүй суух нь энэ эрсдэлийг бүрэн арилгадаггүй аж.
2.Нойроо дутуу авах
Бид заримдаа “дараа л амаръя”, “амралтын өдөр нөхөж унтана” гэдэг. Гэвч нойр бол хуримтлуулж болдог зүйл биш. Нойр дутуу байх нь бие махбодыг нөхөн сэргээх үндсэн процессыг тасалдуулдаг байна. АНУ-ын Харвардын Анагаах Ухааны Сургуулийн судалгаагаар тогтмол зургаан цагаас бага унтдаг хүмүүсийн дархлаа суларч, стрессийн даавар нэмэгдэж, жин нэмэх, сэтгэл гутралд өртөх эрсдэл эрс өсдөг байна. Мөн нойр дутуу байдал нь анхаарал төвлөрөл, ой тогтоолт, шийдвэр гаргах чадварыг шууд сулруулдаг байна.
3. Хэт боловсруулсан, “түргэн” хоол идэх
Завгүй амьдралын хэмнэл биднийг түргэн, хямд, бэлэн хоол идхэд хүргэдэг гэхэд хэлсдэхгүй. Эхэндээ нэг удаагийн сонголт мэт санагдавч энэ нь аажмаар зуршил болдог байна. Харин хэт боловсруулсан хүнс нь элсэн чихэр, давс, ханасан өөх тос ихтэй хэрнээ шим тэжээл багатай байдаг. Дэлхийн Эрүүл Мэндийн Байгууллага болон FAO-гийн хамтарсан тайланд дурдсанаар ийм төрлийн хүнсийг тогтмол хэрэглэх нь таргалалт, бодисын солилцооны эмгэг, зүрх судасны өвчний эрсдэлийг нэмэгдүүлдэг. Мөн гэдэсний бичил биетний тэнцвэрийг алдагдуулж, дархлаанд сөргөөр нөлөөлдөг болохыг тогтоожээ.
Эцэст нь эдгээр зуршлуудын нийтлэг нэг зүйл нь “онц аюултай” мэт харагддаггүйд оршино. Гэвч эдгээр буруу сонголтууд өдөр бүр давтагдсаар байвал эрүүл мэндэд мэдээж сөргөөн нөлөө үзүүлнэ. Угтаа эрүүл амьдрана гэдэг нь нэг өдөр гэнэт бүхнийг өөрчлөх тухай бус харин өдөр тутмын жижиг, энгийн сонголтуудаа ухамсарлаж эхлэх тухай ойлголт юм. Өдөрт хэдхэн минут хөдөлгөөн хийх, нойроо аль болох сайн авах, идэж буй хоолондоо анхаарал хандуулах нь том өөрчлөлт мэт биш байж болох ч урт хугацаандаа эдгээр нь бидний эрүүл мэндийг хамгаалах урьдчилан сэргийлэлт болдог.
