Энэтхэгийн Керала муж дахь Сабаримала Шри Дарма Шаста сүмд 4.5 кг орчим алт алга болсон байж болзошгүй хэрэг илэрч, шашны болон төрийн байгууллагуудыг хамарсан томоохон дуулиан дэгдлээ. Кералагийн Дээд шүүхийн шалгалтаар тус сүмийн ариун өргөөний хоёр талд байрлах “Дварапалакас” болон “Пидамс” шүтээнүүдийн алтан бүрээсийг урьдчилан мэдэгдэлгүйгээр хуулж, засварт илгээсэн нь тогтоогдсон байна. 2019 онд хийгдсэн ижил төрлийн засварын үеийн жингийн баримттай харьцуулахад 4.541 кг алт дутсан байжээ. Үүнээс гадна Траванкор Девосомын Зөвлөл буюу сүмийн удирдах байгууллага эдгээр алт бүрээстэй хавтангуудыг “зэс хавтан” гэж буруу бүртгэсэн нь ил болсон юм.
Эд зүйлсийг Бангалор хотын бизнесмен, лам гаралтай Унникришнан Поттид шинээр алт бүрэх нэрийдлээр өгсөн байжээ. Тэрээр 2019 онд Ченнай дахь “Smart Creations” компанид алт бүрэх ажил гүйцэтгүүлэхээ мэдэгдсэн ч энэ нь сүмийн журмыг илт зөрчсөн үйлдэл байв. Мөрдөн шалгалтын явцад алга болсон эд зүйлсийг Унникришнаны эгчийн гэрээс олсон бөгөөд тухайн үед сүмийн албан тушаалтнууд хяналт, бүртгэлээ зохих ёсоор хийж чадаагүй нь тодорхой болсон байна.
Шүүх уг хэргийг хулгай, хөрөнгө завших, итгэл эвдэх шинжтэй гэж үзэж, тусгай мөрдөн шалгах баг байгуулсан. Мөн Траванкор Девосомын Зөвлөлийн хэд хэдэн албан тушаалтныг шалгаж эхэлжээ. Энэ хэрэг улс төрийн хүрээнд ч шуугиан тарьсан бөгөөд сөрөг хүчин Кералагийн Devaswom-ын сайд В.Н.Васавангийн хариуцлага тооцохыг шаардсанаар Ассамблейн хурал түр зогссон байна.
Сабаримала сүмийн алтны маргаан нь ариун шүтээний үнэт эдлэлийн хадгалалт, хяналт, бүртгэлийн тогтолцоо хэр сул байгааг харуулж, шашны байгууллагын хөрөнгө удирдлагын ил тод байдал, төрийн хяналтын чадавхид асуулт тавьсан үйл явдал болж байна.
