Дэлхийн хамгийн алслагдсан бүс нутгийн нэг болох Өмнөд мөсөн далайн ёроолоос далай судлаачид хэдэн арван шинэ төрөл зүйлийг нээжээ.Энэ оны эхээр тэнгисийн биологичдын баг “R/V Falkor (too)” нэртэй судалгааны хөлгөөр Саут Сэндвичийн арлуудын орчимд шинээр амьд биет илрүүлэх экспедиц хийсэн байна. Тэд 14 төрлийн амьтдын бүлгээс нийт 2000 орчим дээж цуглуулж, 30 шинэ төрөл зүйл нээсэн гэж “Nippon Foundation–Nekton Ocean Census” байгууллага мэдэгдэв.
Хамгийн онцгой нээлтүүдийн нэг нь махчин “үхлийн бөмбөг” хөвөн (Chondrocladia sp. nov.) юм. Энэ хөвөн бөмбөлөг хэлбэртэй бөгөөд гадаргуу нь жижиг дэгээ шиг бүтэцтэй, түүгээрээ анхааралгүй өнгөрөх ангаа барьдаг байна. Энгийн хөвөнгүүд шүүлтүүрээр хооллодог “тайван” арга барилаар тэжээлээ олдог бол, энэ шинэ төрөл зүйл идэш тэжээлийн хувьд илүү идэвхтэй махчин зан илэрхийлдэг аж.
Мөн шинжлэх ухаанд урьд нь бүртгэгдээгүй хуягласан, солонгорч гялалздаг шинэ төрөл зүйлийн өт Eulagisca sp. nov, болон гурван шинэ төрөл далайн од (Brisingidae, Benthopectinidae, Paxillosidae) илэрсэн байна.
Үүнээс гадна өмнө нь тодорхойлоогүй хэд хэдэн нялцгай биетэн (crustacean), тухайлбал isopod, amphipod зэрэг төрөл олдсон бөгөөд бүрэн шинжилсний дараа шинэ amphipod-ийн гэр бүл байж болзошгүй гэж судлаачид үзэж байна. Мөн газар хөдлөл, галт уулын халуун орчинд дасан зохицсон шинэ хясаа болон далайн дунгийн төрөл, түүнчлэн шинэ төрлийн хар шүр (black coral) нээсэн байж болзошгүй байна.
Судалгааны явцад эрдэмтэд “зомби өт” (Osedax sp.) хэмээх сонирхолтой амьтныг ажиглажээ. Энэхүү өт ам, ходоодгүй бөгөөд бактеритай хамтран ажиллаж, халим зэрэг том сээр нуруутан амьтдын ясанд агуулагдах өөх тосыг задлан хооллодог аж. “Зомби” өт нь өмнө нь шинжлэх ухаанд мэдэгдэж байсан ч амьдралын орчны гүнээс шалтгаалан ховор ажиглагддаг гэнэ.
Энэхүү экспедиц нь өндөр нарийвчлалтай гүний зураглал, алсын удирдлагатай камер (ROV) зэрэг орчин үеийн технологийн тусламжтайгаар хүний нүдэнд хэзээ ч харагдаж байгаагүй бүс нутгийг судлах боломжийг олгожээ.
“Далай судлалд технологи, судалгааны цаг, дэлхийн эрдэм шинжилгээний хамтын ажиллагаа нэгдэх үед ямар гайхамшигтай үр дүн гарч болохыг энэ судалгаа харууллаа,” гэж Шмидтийн далайн хүрээлэнгийн гүйцэтгэх захирал Жиотика Вирмани хэлэв. Тэрбээр мөн энэхүү аяллын явцад “аврага наймаалжийн нялх үеийг анх удаа баримтжуулсан гэдгийг онцолжээ.
“Nekton Ocean Census”-ийн шинжлэх ухааны ахлах ажилтан Мишель Тейлор “Одоогоор бид судалгааны дээжний 30 хувийг л шинжилж дууссан. Гэтэл аль хэдийн 30 шинэ төрөл илрүүлсэн нь Өмнөд мөсөн далай дахь биологийн олон янз байдал ямар их хэмжээгээр судлагдаагүй байгааг харуулж байна” гэж мэдэгджээ.
Эх сурвалж: ABC news