Netflix-ийн алдарт романтик инээдмийн цуврал “Emily in Paris” шинэ бүлгээрээ энэ өвөл эргэн ирэхээр боллоо. 2020 онд эхэлснээсээ хойш дэлхий даяар үзэгчдийг байлдан дагуулсан энэ бүтээл тавдугаар улиралдаа Парисын хотоос хальж, Италийн Ром, Венецийн уур амьсгалыг шингээхээр болжээ.
Бүтээгч Даррен Стар “Энэ улирал бол хоёр хотын түүх — Парис ба Ромын тухай. Эмили хайр, амьдралаа дараагийн түвшинд хүргэнэ” хэмээн тайлбарлаж, шинэ тизерийг олон нийтэд танилцуулсан. Тэрээр “Парисын дээврээс Ромын балгас хүртэл бид Эмилигийн шинэ бүлгийг үзэгчдэд хүргэх гэж байна” гэжээ.
Өмнөх улиралд Эмили (жүжигчин Лили Коллинз) Италийн загварын ертөнцийн өв залгамжлагч Марчеллотой учирч, шинэ карьерийн төлөө Парисаас Ром руу нүүж байсан. Энэ удаа тэр зөвхөн Ром төдийгүй Венецийн үзэсгэлэнт гудамжуудаар аялах бөгөөд түүний амьдрал илүү өргөн хүрээтэй, илүү насанд хүрсэн өнгө аястай өрнөхийг найруулагчид амлаж байна.
Коллинзийн хэлснээр “Бид Эмилийг илүү өөрийнхөөрөө, илүү тэнцвэртэй, илүү инээмсэглэл дүүрэн эмэгтэй болгож харуулахыг хүссэн. Марчелло бол түүний шинэ адал явдал” гэжээ. Гэхдээ Парист үлдсэн хуучин хайр Габриел (жүжигчин Лукас Браво) Эмилийг мартаж чадахгүй, харин бүхнийг эргүүлэх гэж оролдох нь шинэ бүлгийн гол эргэлтийн цэг болох аж.
“Emily in Paris” цуврал Netflix-ийн хамгийн үзэлттэй романтик бүтээлүүдийн нэг бөгөөд дөрөвдүгээр улирал нь нээлтийн дараах дөрвөн хоногт 19.9 сая удаа үзэгдэж, 93 улсад Top 10-т багтсан амжилттай байсан.
Шинэ бүлэгт Парисын дэгжин байдал, Италийн дулаахан өнгө, хайр ба ажил хоёрын дундах тэнцвэрийг эрэлхийлсэн Эмилигийн түүх үргэлжилнэ.
