2025-2026 оны хичээлийн жилд боловсролын салбарт хэрэгжиж буй ерөнхий боловсролын сургуулийн бага ангийн сургалтын хөтөлбөрийн шинэчлэл, Боловсролын сайдын 2023 оны “Цахим системд суурилсан англи хэлний хөтөлбөр хэрэгжүүлэх, төлөвлөгөө батлах тухай” А/353 дугаар тушаалын хүрээнд 3,4 дүгээр ангид англи хэлний хөтөлбөрийг хэрэгжүүлэхтэй холбогдуулан багш нарын мэргэжлийн ур чадвар, заах арга зүйг нэмэгдүүлэх чадавхжуулах сургалт эхэллээ.
Энэ хичээлийн жилд төрийн өмчийн ерөнхий боловсролын 668 сургуулийн 3,4 дүгээр ангийн 4208 бүлэгт, 135626 суралцагч англи хэлний хөтөлбөрөөр, долоо хоногт 2 цагаар хичээллэнэ.
Энэ хүрээнд сургалт 2 үе шаттай зохион байгуулагдана. Үүнд:
Нэгдүгээр үе шат – “Сургагч багш бэлтгэх” сургалт 2025 оны 08 дугаар сарын 20-22-ны өдрүүдэд,
Хоёрдугаар үе шат – Аймаг, нийслэлийн англи хэлний багш нарыг бэлтгэх сургалт 2025 оны 08 дугаар сарын 25-27-ны өдрүүдэд аймаг, нийслэлийн хэмжээнд тус тус зохион байгуулна.
Нэгдүгээр шатны сургалтад бага ангид англи хэлний хичээл заах шилдэг арга зүйтэй аймаг, нийслэлийн 89 багш, гадаад хэлний 21 мэргэжилтэн хамрагдаж байна.
СУРГАЛТААР
Бага ангийн суралцагчдын сэтгэхүйн онцлог, хэл сурах үйл явцын талаарх ойлголтыг гүнзгийрүүлэх,
3, 4 дүгээр ангийн цогц хөтөлбөрийн онцлог, бүтэц, агуулга, сурах бичиг, дагалдах материалын талаар нэгдсэн ойлголт өгөх,
Сургалтын идэвхтэй аргуудыг ашиглан сурагч төвтэй багшлахуйд суралцах,
Сургалтын цахим платформ, дижитал контентыг хичээлдээ үр дүнтэй ашиглах чадварыг хөгжүүлэх,
Анги удирдах, ялангуяа олон хүүхэдтэй ангид суралцагчдын оролцоог жигд хангах, ялгаатай хэрэгцээг тооцох арга барилд суралцах,
Суралцагчдын ахиц дэвшлийг үнэлэх, хөтөлбөрт суурилсан үнэлгээний аргуудыг ашиглах чадвартай болох
Багш нарын хамтын ажиллагаа, туршлага солилцох, мэргэжлийн хөгжлийн бүлгийг дэмжих зэрэг чадвар олгоход чиглэнэ.
2025-2026 оны хичээлийн жилийн сургалтын бэлэн байдлыг хангах хүрээнд дараах чиглэлд бэлтгэл байдлыг ханган ажиллаж байна.
Багшлах хүний нөөцийн хүрэлцээ, бэлэн байдлыг хангах талаар чиглэл батлагдана.
3, 4 дүгээр ангид англи хэлний хичээл заах багш нарыг чадавхжуулах сургалтыг 2 үе шаттай зохион байгуулж байна.
Сурах бичиг, сургалтын хэрэглэгдэхүүн хэвлэгдэн гарсан бөгөөд түгээлтийн ажил хийгдэж байна.
Цахим тоног төхөөрөмжийн бэлэн байдал хангагдсан. /Цахим анги-891, таблет-30298, ухаалаг самбар-2543/
Сургалтыг Боловсролын ерөнхий газар, IEDC Pearson Partner Mongolia хамтран зохион байгуулж байна.
