Эдийн засаг, хөгжлийн яамны Төрийн нарийн бичгийн дарга И.Батхүү НҮБ-ын Ази, Номхон далайн Эдийн засаг, нийгмийн комисс (ESCAP)-ын Түншлэл ба зохицуулалтын асуудал хариуцсан нарийн бичгийн даргын орлогч Хирохито Тода, Зүүн Хойд Азийн дэд бүсийн газрын дарга Б.Ганболд нарыг хүлээн авч уулзлаа.
Уулзалтаар Улаанбаатар хотноо 2025 оны 10 дугаар сарын 21–23-ны өдрүүдэд хамтран зохион байгуулсан “Тогтвортой хөгжлийн зорилгын асуудлаарх Зүүн Хойд Азийн олон талт чуулга уулзалт”-ын үр дүн, цаашид 2026 онд бүс нутгийн хэмжээнд бусад улсуудад зохион байгуулагдах арга хэмжээнүүд, чиглэл болон эдгээр арга хэмжээнүүд дэх Монгол Улсын оролцоог дараагийн түвшинд авчрах боломжуудын талаар санал солилцлоо.
Мөн уулзалтын үеэр тус байгууллагатай хамтран хэрэгжүүлж буй дижитал худалдааны үндэсний замын зураглал, дижитал худалдааг хөгжүүлэх бэлэн байдлын шинжилгээг боловсруулах зэрэг арга хэмжээнүүд, мөн дэд бүтцийн бус салбаруудад ногоон төслийн сан үүсгэх, худалдаа болон боомтын хөгжлийг дэмжих чиглэлээр хамтран ажиллахаар тохиролцов.
Өнөөдөр Нэгдсэн Үндэстний Байгууллага үүсгэн байгуулагдсаны 80 жилийн ой тохиож байгаа ба Эдийн засаг, хөгжлийн яамны зүгээс НҮБ-д халуун баяр хүргэж, Монгол Улсын тогтвортой, хүртээмжтэй хөгжлийн төлөө тууштай хамтран ажиллаж ирсэнд гүн талархал илэрхийлж байна.
Цаашид энх тайван, тогтвортой хөгжил, хамтын хөгжил дэвшлийн нийтлэг зорилгыг хэрэгжүүлэхийн төлөө НҮБ болон гишүүн орнуудтайгаа харилцан ойлголцол, итгэлцэлд тулгуурлан хамтын ажиллагаагаа улам гүнзгийрүүлнэ гэдэгт итгэлтэй байна.
