“Амт, үнэр, өнгийг урлан бүтээдэг тогооч бол зөвхөн хоол хийдэг хүн бус нийгэм, соёл, хүнсний салбарт ололт амжилтыг бататгадаг зайлшгүй чухал мэргэжлийн эзэн юм. Бүтээлч сэтгэлгээ, сахилга бат, багаар ажиллах чадвар, мэргэжлийн мэдлэг, шинэчлэлийн чадвар нь энэ мэргэжлийн эзнийг улам өнгөлдөг.
HumanZ сайт бидний нийгмийг бүтээгчдийг онцлон тэдний танилцуулдаг билээ. Энэ удаа та бүхэнд хоолны урлагийг түгээгч Ишдоржийн Ганболдыг танилцуулж байна.
“Миний үндсэн мэргэжил бол механик инженер боловч, өөрийн дотоод хүсэл сонирхол, хобби тогооч мэргэжил байсан. Тийм болохоор ч тэр үү хоол хийх энэ их хүсэл сонирхол маань намайг хоол үйлдвэрлэлийн салбарт өөрийн эрхгүй татан оруулж зоогийн газар, ресторан, аялал жуулчлалын салбарт сурч мэдэх, ажиллах, бусдад хоол хийх урлагыг зааж сургах боломжийг олгосон гэж боддог. Миний ажил амьдралын замнал бол уламжлалт боловсрол, олон талт туршлага, өөрийн хүсэл сонирхол, хоббиг нэгтгэсэн аялал гэж хэлж болно” гэх тэрбээр энэ салбарт тасралтгүй 20 жил ажиллаж буй юм. Ингээд хамтдаа ярилцлагаа эхлүүлье.
Инженерийн мэргэжил эзэмшсэн хүн хоол үйлдвэрлэлийн салбарт тогооч мэргэжил рүү шилжсэн гэдэг нь сонирхолтой байна л даа. Энэ талаараа?
Инженерийн мэргэжил эзэмшсэн ч сурахынхаа зэрэгцээ хоол үйлдвэрлэл, үйлчилгээний салбарт ажиллаж, хоол хүнстэй холбоотой ур чадвар эзэмшсэн. 1998 онд хувийн зоогийн газар, ресторан байгуулж, өөрөө тогооч, менежерийн ажлыг хийсэн нь миний мэргэжлийн гарааг эхлүүлсэн. Хоол хийх урлаг нь зөвхөн ажил биш, миний хүсэл тэмүүлэл болсон.
Шинжлэх ухаанч байдал, урлагийн мэдрэмжийн хослол болсон энэ мэргэжилд таны баримталдаг философи юу вэ?
Хоол гэдэг бол зөвхөн амт, чанар бус эрүүл зөв хооллож эрүүл байх үнэ цэнийг илэрхийлдэг учраас зөвхөн хоолыг биш хоолны соёлыг түгээхдээ чухал юм. Миний хувьд Япон хоол, тэр дундаа сүшиг Монголд нутагшуулахад хувь нэмэр оруулсан Ц.Мэнджаргал найзаасаа уг мэргэжлийг суралцан түүнийгээ бусдад зааж сургаж, хоолны соёлыг түгээж байгаадаа бахархдаг. Гараа сайн бол бариа сайн гэдэг дээ. Цаашдаа монгол уламжлалт хоолыг дэлхийн олон орны хоолны соёлтой уялдуулан хөгжүүлэх зорилготой.
Тогооч И.Ганболдын онцлох ажлын туршлагаас:
- “Уранган” ХХК рестораныг 9 жил амжилттай удирдсан.
- “Аркади” ХХК-ийн захирлаар 16 жил ажиллаж, компанийн тогтвортой өсөлтийг хангаж чадсан.
- “Монгол Алтай Тур энд Ферм” ХХК-д зөвлөх тогооч, менежерээр ажиллаж, жуулчны баазын үйл ажиллагаа, багийн хөгжүүлэлт дээр анхаарч ажилласан.
- 2012 онд мэргэжлийн тогоочийн үнэмлэхээ авч, 2013 онд Мико сүшиний газарт япон хоолны ур чадвар эзэмшсэн.
Таны цаашдын зорилго, алсын хараа юу вэ?
Монгол үндэсний хоолыг монгол хүний эрүүл мэндэд илүү тустай эрүүл зөв хооллолтын орчин үеийн хоолны технлоги арга барилтай хослуулан түгээн дэлгэрүүлэх зорилгоог аялал жуулчлалтай холбон хөгжүүлэн дэлгэрүүлэх алсын хараатай. Мөн шинэ залуу тогоочдыг сургаж, олон улсын жишигт хүрэхэд нь туслаж ажилладаг. Тиймээс цаашдаа ч энэ зорилгоо өргөжүүлэн ажиллах болно.
HumanZ.mn