Манай humanz.mn сайт нь унших дадлыг дэмжих, олон нийтийн мэдлэгт нэмэр болох, уншиж бичих чадварыг хөгжүүлэх зорилгоор алдартай зохиолчдын бичсэн номын онцлох агуулгуудыг хүргэдэг билээ. Энэ удаа бид зохиолч Я.Арслангийн “Эрүүл урт наслах алтан судар” номыг сонголоо. Энэхүү бүтээл нь 2023 онд уншигчдын гарт хүрсэн бөгөөд сонирхолтой олон мэдээллийг багтаажээ. Тус номонд багтсан мэдээллээс уншигч танд хүргэе. Та бүхэн “Эрүүл урт наслах алтан судар” номыг Интерном дэлгүүрээс худалдан авах боломжтой.
Хий ханиалгах үед
Нэг хумс саримсыг жижиглэн хэрчсэн 10 жижиг сонгинотой нийлүүлээд сүүнд хийж, ааг нь зөөлөртөл буцалгана. Ингээд дээрээс нь зөгийн бал, батрашийн шүүс нэмж, цаг тутам 1 хоолны халбагыг ууна.
Луувангийн шүүсийг элсэн чихэртэй хутгаад хоолны халбагаар 1 цагийн зайтай ууна. Элсэн чихрийн оронд зөгийн бал хэрэглэж болно. Бас луувандаа хонхор гаргаад бал дүүргэж, нэг хэрчим луувангаар таглаад 3-4 цаг байлгана. Үүнээс үүссэн сиропыг өдөрт 3 удаа ууна.
Хүүхдийн ханиалганд сайн сироп уулгая гэвэл 2 хоолны халбага элсэн чихрийг хайруулд хийж хайлуулаад, 125 мл буцламгай усыг үсчүүлэхгүй алгуурхан нэмнэ. Үүнээс үүссэн сиропыг хүүхдэд ид ханиах үед нь юмуу унтахаас нь өмнө уулгана.
Мөн угсруулж ханиалгах үед таван салааны шингэн тус болдог. Үүнд 1 хоолны халбага таван салаан дээрээс буцалсан ус хийж бүтээгээд 2 цаг байлгана. Дараа нь түүнийгээ шүүж том халбагаар хоолны өмнөхөн юмуу ид ханиалгах үед ууна.
Цэр ховхлохын тулд морин улааганыг буцалгаж зөгийн балтай ууна. Үүнд 1 аяга жимсэн дээр 1 литр халуун ус хийгээд 10 минут буцалгаж, дараа нь шүүж, 3 хоолны халбага зөгийн бал хийгээд өдөрт 3-4 удаа хагас аягыг ууна.
Эх сурвалж: “Эрүүл урт наслах алтан судар” ном
