Арабын Нэгдсэн Эмират Улсад халал аргаар бэлтгэсэн махыг Монгол Улсаас экспортлох ажиллагаа албан ёсоор эхэлжээ.
Өнгөрсөн онд халал аргаар мах бэлтгэх АНЭУ-ын стандартын шаардлагыг хангаж, тус улсад мах нийлүүлэх зөвшөөрлийг манай улсын мах экспортлогч аж ахуйн нэгж анх удаа авсан. Үүний үр дүнд монгол хонины махыг Эмиратын зах зээлд өнгөрсөн сараас нийлүүлж эхэллээ. Ингэснээр Монгол Улсаас АНЭУ-ын зах зээлд халал аргаар бэлтгэсэн мах экспортлох боломж нээгдэж байна хэмээн ГХЯ мэдээлэв. Халал аргаар бэлтгэсэн мах нь цусгүй байдаг учраас шингэн ягаан өнгөтэй, цус хурдаггүй, удаан хадгалахад өнгө нь харлаж өөрчлөгддөггүйгээрээ онцлог аж.
