Засгийн газар “АЛТ-3” хөтөлбөрийг баталж, 100 тонн алтны нөөц бүхий стратегийн ордуудыг эдийн засгийн эргэлтэд оруулна хэмээн сүр дуулиантай мэдэгдсэн. Гэвч УИХ-д өргөн баригдсан тогтоолын төсөлд эдгээр гол ордуудыг ашиглах эрх зүйн боломжийг бүрдүүлэх заалт хасагдсанаар уг хөтөлбөр бодит хэрэгжилтгүй, хоосон дүр эсгэх төдий боллоо. Учир нь 2025 оны зургаадугаар сарын 25-ны өдрийн Засгийн газрын хуралдаанаар хэлэлцсэн “АЛТ-3” хөтөлбөрийг хэрэгжүүлэх УИХ-ын тогтоолын төсөл нь эдийн засгийн чадавхыг нэмэгдүүлэх, валютын нөөцийг нэмэгдүүлэх стратегийн зорилготой байв. Гэвч УИХ-д өргөн баригдахдаа хөтөлбөрийн бодит хэрэгжилтэд чухал үүрэгтэй зарим заалтууд хасагдсан нь хөтөлбөрийн үр өгөөжийг хязгаарлах нөхцөл бүрдүүлсэн байна.
Хасагдсан гол заалтууд:
Тусгай хамгаалалтын бүсээс хэсэгчлэн гаргах тухай заалт
Алт 3 хөтөлбөрийн хүрээнд эдийн засгийн эргэлтэд оруулах гол ордууд болох:
Гацуурт (Сэлэнгэ, Мандал сум)Баавгай, Эрээн Шурадгын гол (Хэнтий) эдгээр орд газрууд нь Ойн сан, Усны сан бүхий газар, Тусгай хамгаалалттай газар нутгийн дэглэмд багтсан учир одоогийн хуулийн хүрээнд ашиглах боломжгүй байгаа. Тиймээс Засгийн газар эдгээр ордуудыг УИХ-ын тогтоолоор тусгай хамгаалалтын бүсээс хэсэгчлэн гаргаж, уул уурхайн үйл ажиллагааг зөвшөөрөхийг тусгаж байжээ. Гэвч УИХ-д өргөн барихдаа энэ заалтыг хассан тул эргэлтэд оруулах стратегийн ордуудыг ашиглах боломжгүй болсон.
Уул уурхайг ногоон хөгжлийн бодлоготой уялдуулах, нөхөн сэргээлтийн баталгааг шаардах агуулга
Байгаль орчны нөхөн сэргээлт, олборлолтод хариуцлагатай байх тусгай нөхцлүүдийг хавсаргах санал байсан ч энэ талаарх тусгай заалтууд мөн төслөөс хасагдсан гэх мэдээлэл байна.
Үр дагаварт нь “АЛТ 3” хөтөлбөр нь бодит ашиглалтад шилжих боломжгүй болж болзошгүй. Ингээд нүүрсний үнэ дэлхийн зах зээл дээр унаж 70 доллар ч хүрэхгүй байгаа энэ үед бидний эдийн засгийн хямралаас гарах алтан боломж алдагдах уу?
