Зорьсон зорилгодоо хүрч, өсөн дэвжихийн тулд бид тодорхой сахилга баттай байж, ухаан санаа болон бие бялдарт эерэгээр нөлөөлөх зуршлуудыг амьдралынхаа хэв маягийн нэгэн хэсэг болгох хэрэгтэй. Мэдээж заавал амжилттай байхын тулд бус надад ямар үр дүнг авчрах вэ гээд бодож үзвэл танд дараах зуршлууд тийм ч хүнд санагдахгүй болов уу?
Өдөр бүр ороо хураах
Ороо хурааж хэвших нь сахилга баттай байхын үндэс. Өглөө болгон ганц хоёр минутыг ороо хураахад зарцуулах нь таны бусад зүйлсэд хандах хандлагыг тодорхойлдог ч гэж үздэг байна. Мэдээж эмх цэгцтэй байвал ухаан санаа хүртэл цэгцэрнэ шүү дээ.
Ус уух
Бидний бие организм шөнийн цагаар сэргэж, энерги хуримтлуулахаас гадна шингэний алдагдалд орсон байдаг. Та өлөн ходоод дээрээ ус ууснаар дотор эрхтний үйл ажиллагаа хэвийн явагдаж эхэлдэг.
Хүйтэн шүршүүрт орох
Халуун биш хүйтэн усаар бие угаах нь таны мэдрэлийн системд сайнаар нөлөөлж, биеийн алжаалыг тайлдаг.
Хийх ажлуудаа жагсаах
Танд амжуулах ёстой өчнөөн ажил байдаг ч хаанаас эхлэхээ мэдэхгүй үе гардаг уу? Тэгвэл энэхүү зуршлыг хэрэгжүүлснээр чухал болон чухал бус ажлуудаа ялган илүү үр бүтээлтэй байна гэдэгт итгэлтэй байна.
Ном унших
Ном унших нь мэдлэгийг тань арвижуулах хамгийн шалгарсан арга. Заавал олон хуудас уншихгүйгээр өдөрт 20-30 минут зарцуулахад л хангалттай.