Нуруун дээр гарсан батгыг ямарваа нэг нүүрний тос, маск, батганы түрхлэгээр эмчлэх нь зөв арга биш ажээ. Нуруун дээрх батга нь нүүрний батгатай ижил шалтгаанаар гардаг ч (хэт их себум буюу тослог ялгарч бактери үржих нөхцөл үүссэн тохиолдолд) эмчлэх арга нь өөр гэдгийг арьсны эмч нар хэлдэг. Тэгвэл мэргэжилтнүүд ямар аргуудыг зөвлөдөг талаар энэхүү нийтлэлээс уншаарай.
Ариун цэвэр сахих
Хувцас, ор, хөнжлийн даавуу, алчуураа тогтмол солих хэрэгтэй. Бохир хувцас, даавуу, алчуур нь бактери үүсэх таатай нөхцөл болдог тул тогтмол цэвэрлэх нэн шаардлагатай юм. Мөн биеийн хүчний ажлын дараа усанд орохыг зөвлөдөг.
Спортоор хичээллэхдээ хэт бариу хувцас өмсөхгүй байх
Хэт бариу хувцас нь арьсны нүх, сүвийг бохирдуулж, үсний уутан хальсыг үрэвсүүлдэг сөрөг талтай байдаг.
Үрэвслийн эсрэг үйлчилгээтэй хоол хүнс
Үрэвсэл дардаг үйлчилгээтэй навчит ургамал, загас, улаан лоолийг хоолныхоо цэсэд оруулах нь таны батганы эмчилгээг дэмжих болно.
Элсэн чихрийн хэрэглээгээ багасгах
Элсэн чихэр, нүүрс усны хэрэглээгээ багасгах шаардлагатай. Оронд нь авокадо, хулд загас, хушга зэрэг Омега 3-аар баялаг хоол, хүнсийг өргөнөөр хэрэглэх.
Мэргэжлийн арьсны эмчид хандах
Та эмчилгээгээ юун түрүүнд мэргэжлийн хүний зөвлөгөөнөөс эхлүүлэх нь хамгийн оновчтой арга. Эмч нар таны батга гарах болсон шалтгааныг тогтоож зөвхөн танд тохирох эмчилгээг (эмийн, дааврын, гаднаас нь түрхлэг хэрэглэж, шарлага хийх зэрэг) бичиж өгөх болно.
