Таны бие мах бодь болон оюун санааны энерги, эрч хүч багасаж ядарснаас болж ажлын өдрүүдийн үдийн цагаар унтаж, амармаар санагдах, ажлын бүтээмж буурч байгаа мэт сэтгэгдэл төрж байсан уу? Тэгвэл танд эрч хүчээ сэргээж болох энгийн таван аргыг хуваалцъя.
1. Дасгал хөдөлгөөн хийх
Ядарч сульдсан үедээ дасгал хийхийг хүсэх хүн ховор. Гэвч дасгал хөдөлгөөн нь энергийн түвшинг нэмэгдүүлэхэд ихээхэн нөлөөтэй гэдгийг олон судалгаа нотолсон. Дасгал хөдөлгөөн тогтмол хийснээр биеийн тамир тэнхээг нэмэгдүүлээд зогсохгүй амьдралын чанарт бүхэлд нь эерэг нөлөө үзүүлдэг. Хөдөлгөөний идэвхтэй хүмүүс өөртөө илүү итгэлтэй, аз жаргалтай байдаг. Мөн дасгал хөдөлгөөн нь зүрх, уушги, булчингийн үйл ажиллагааг дэмждэг бөгөөд авто машинтай зүйрлэвэл шатахуун зарцуулалтын үр ашгийг нэмэгдүүлэхтэй адил. Ямар ч төрлийн дасгал хөдөлгөөн таны эрч хүчийг нэмэгдүүлнэ.
2. Ус уух
Шингэний дутагдал энергийн түвшинг бууруулж, бие махбодийн хэвийн үйл ажиллагаанд сөргөөр нөлөөлдөг. Өөрөөр хэлбэл шингэн дутагдсан үед анхаарал төвлөрөл, сонор сэрэмж буурдаг байна.
3. Ойр ойрхон хооллох
Өдрийн турш тогтмол цагт бага хэмжээгээр, ойр ойрхон хооллох нь цусан дахь сахарын хэмжээг тогтвортой байлгахад тустай.
4. Биологийн цагаа дагах
Зарим хүмүүс өглөө эрт эрч хүч дүүрэн байдаг бол зарим нь оройн цагаар илүү эрч хүчийг мэдэрдэг. Энэ нь өдөр тутмын энергийн түвшин, хэмнэл хүн бүрд харилцан адилгүй байдагтай холбоотой. Иймд өөрийн хэмнэлийг сайтар ажиглаж, ойлгох нь зүйтэй. Энергийн түвшин өндөр байдаг үедээ яаралтай, чухал ажлаа төлөвлөж хийх зэргээр өөрийн биеийн биологийн цагийг үр дүнтэй ашиглаж болно.
5. Чихэндээ иллэг хийх
Энэ нь ядаргаанаас салах хамгийн энгийн арга. Учир нь чихэнд биологийн идэвхт 170 цэг байдаг ба эдгээр нь биеийн бүхий л эд эрхтэнтэй уялдаа холбоотой. Мөн цусны эргэлтийг сайжруулж мэдрэлийн системийг идэвхжүүлдэг.
