Технологийн ирээдүйн чиг хандлагыг олон арван жилийн турш урьдчилан таамаглаж ирсэн зохион бүтээгч, футурист Рэй Курцвейл 2030 он гэхэд хүн төрөлхтөн нанотехнологийн тусламжтайгаар биологийн хязгаарыг даван, мөнх наслах боломжтой болно гэсэн таамаг дэвшүүлжээ.
Тэрээр энэ талаар “Adagio” подкастын үеэр ярилцлага өгөхдөө:
“Бидний цусны эргэлтэд микроскопоор харж болох нанороботууд ажиллаж, өвчин эмгэгийг илрүүлж, эмчилж, эсийн гэмтлийг сэргээж чаддаг болох цаг тун ойрхон байна” хэмээн онцолсон юм.
Рэй Курцвейл бол Google компанийн инженерчлэлийн захирлаар ажиллаж байсан, хиймэл оюун ухаан, хүний тархины загварчлалын судалгаагаар алдартай судлаач бөгөөд өмнө нь олон оновчтой таамаг дэвшүүлж байснаараа алдартай. Жишээлбэл, тэрээр 1990-ээд оны үед ухаалаг гар утас, интернэт худалдаа, хиймэл оюун ухааны хөгжил зэрэг олон чухал өөрчлөлтийг зөв таамагласан.
Түүний шинэ таамаглалд тусгагдсан гол санаа бол:
- Нанороботууд хүний биед орж, эсийн гэмтлийг засаж, хөгшрөлтийн процессыг зогсооно.
- Генийн инженерчлэл, хиймэл оюун ухаан, биотехнологийн хослол нь хүний насыг хязгааргүй уртасгах суурь болно.
- 2030 он гэхэд хүн төрөлхтөн “нас барах шаардлагагүй” үе шат руу орж эхэлнэ.
Гэвч энэ таамаг олон нийтийн дунд маргаан дагуулж байгаа. Зарим эрдэмтэд үүнийг хэт өөдрөг үзэл хэмээн үзэж байгаа бол, зарим нь техникийн хувьд хүрч болох боломж гэж харж байна.
Технологийн үсрэнгүй хөгжлийн энэ эринд “нас баралт зайлшгүй зүйл биш” гэх санаа одоо эргэлзээ гэхээсээ илүү судалгааны бодит чиглэл болон хувирч буйг Курцвейлийн мэдэгдэл харуулж байна.
