Нэгдсэн Үндэстний Байгууллага /НҮБ/-ын Хөгжлийн хөтөлбөрийн Суурин төлөөлөгч Матилда Димовскатай уулзаж, ДАДЛАГАЖИГЧААР ХӨДӨЛМӨР ЭРХЛЭЛТИЙГ НЭМЭГДҮҮЛЭХ төслийг хэрэгжүүлэхээр болсныг УИХ-ын гишүүн, Гэр бүл, Хөдөлмөр, Нийгмийн хамгааллын яамны сайд Л.Энх-Амгалан онцоллоо.
Тэрбээр “Хөдөлмөрийн зах зээл дээр нэг талдаа ажиллах хүчний хомсдолтой, нөгөө талдаа ажилгүйдэлтэй парадокс үүссэн гэдгийг удаа дараа хэлж байгаа. НҮБ-ын Хөгжлийн хөтөлбөртэй хамтран хөдөлмөр эрхлэлт, хоршоо, мэргэжлийн боловсрол, ажил олгогчийг дэмжих чиглэлээр төсөл хөтөлбөрүүд хэрэгжүүлсэн. Үр дүнд хүрсэн нь ч байна. Зорилтод түвшиндээ хүрч үр дүн гараагүй нь ч байна” гэлээ.
Засгийн газрын 2024-2028 оны үйл ажиллагааны хөтөлбөртэй уялдуулж, Дадлагажигчаар хөдөлмөр эрхлэлтийг нэмэгдүүлэх төслийн хамтран хэрэгжүүлэх талаар ярилцаж Төслийн хүрэээнд мэргэжлийн боловсрол эзэмшсэн, цагийн ажил хийдэг, албан бус хөдөлмөр эрхлэгч 7500 иргэнийг ажилтай болгоно гэсэн тооцоолол гаргажээ. Мөн “Цаашид дээрх төслүүдийг хэрэгжүүлэхдээ зорилтот бүлэг рүү чиглэж, мэргэжлийн холбоо, цагийн ажлын бирж, ур чадвар олгодог сургалтуудын уялдаа холбоог нь сайжруулж үр дүнд хүргэнэ” гэв.
