Өмнөд Солонгосын нисгэгчгүй онгоцууд Пхеньяны дээгүүр суртал ухуулгын хуудас хаясны дараа Хойд Солонгосын арми фронтын их бууны ангиудад Өмнөд Солонгос руу “гал нээхэд бүрэн бэлэн байхыг” тушаасан тухай төрийн мэдлийн KCNA агентлаг ням гарагт мэдээлэв.
Өмнөд Солонгосын тал энэ сард гурван удаа суртал ухуулгын хуудас ачсан нисгэгчгүй онгоцоор нийслэл хотын дээгүүр ниссэн гэж Хойд Солонгосын засгийн газар баасан гарагт мэдэгдсэн. Хойд Солонгос өмнөх суртал ухуулгын кампанит ажилд хариу арга хэмжээ авч, хог хаягдал, ялгадасаар дүүргэсэн бөмбөлөгүүдийг урд зүг рүү илгээж байсан бол сүүлийн үеийн хэрэг явдал нь цэргийн хариу арга хэмжээ авах шаардлагатай гэж KCNA мэдээлсэн байна.
Хойд Солонгосын ардын армийн жанжин штабаас аравдугаар сарын 12-нд хилийн дагуух нэгдсэн их бууны ангиудад гал нээхэд бүрэн бэлэн байх тушаалыг өгсөн. Уг тушаалд “дайны үеийн бүрэн хүчин чадлаар бүрэн зэвсэглэсэн найман их бууны бригад гал нээх бэлэн байдалд байна” гэж мэдэгджээ.
Хойд Солонгос өмнөд хилийн дагуу 10 мянга гаруй их буу байрлуулсан гэж үздэг бөгөөд үүний 6000 нь Өмнөд Солонгосын хүн амын томоохон төвлөрөлтэй хотуудад байдаг гэж АНУ-ын армийн санхүүжүүлдэг судалгааны төв болох RAND корпорацийн 2020 оны тайланд дурджээ. Хэрэв хоёр Солонгосын хооронд дайн дэгдвэл нэг цагийн дотор Сөүл, Инчон, Гимпо болон Өмнөд Солонгосын бусад хотод 205 мянга гаруй хүн амиа алдах магадлалтай гэж RAND-ийн тайланд дурджээ.
Хойд Солонгосын удирдагч Ким Чен Ирийн эгч Ким Ё Жон ням гарагт KCNA агентлагаас хийсэн мэдэгдэлдээ, Пхеньян Өмнөдийн "ухуулах хуудас тарааж" байгааг "улс төрийн зорилготой ноцтой өдөөн хатгалга, тусгаар тогтнолд халдсан үйлдэл" гэж үзэж байгааг анхааруулжээ.
