УИХ-ын гишүүн, Гэр бүл, хөдөлмөр, нийгмийн хамгаалын яамны сайд Л.Энх-Амгалан Боловсрол, шинжлэх ухааны сайдаар ажиллаж байхдаа Финландын “Эдүтэн” хөтөлбөрийн захирлуудтай уулзаж зөвхөн Монгол Улсын өндөр төлбөртэй хувийн сургуулиудын хүүхдүүдэд ордог үнэ өндөртэй хөтөлбөрийг төрийн өмчийн бүх сургуулийн 2-5 дугаар ангийн хүүхдүүдийн хөтөлбөрт оруулж байсан. Энэ хөтөлбөр нь хүүхдүүд тоглонгоо тоо бодож, өөр, өөрийн онцлог, хурдад тохирсон дасгал ажиллан хичээллэдэг.
Тэгвэл уг ажлын хүрээний дагуу Финландын “Эдүтэн” хөтөлбөрийн ерөнхий захирал Хэнри Мүүримаа, Хамтын ажиллагааны захирал Макке Леппанен, “Эдүтэн” хөтөлбөрийн Монгол дахь төлөөлөгчидтэй дахин уулзаж үр дүнгийн талаар сонсож, ярилцжээ.
2022 онд анх Монгол Улсын боловсролын салбарт эхлүүлсэн Финландын Туркугийн их сургуулийн Эдүтэн хөтөлбөрийг санаачлагч эрдэмтэн, багш нар Монголд ажиллаж, хөтөлбөрийн хэрэгжилтэд дэмжлэг үзүүлж, зөвлөн тусалж ажиллаж байна. Энэ хичээлийн жилийн эхний нэг сар буюу дөрвөн долоо хоногийн хугацаанд Монгол Улсын 2-5 дугаар ангийн сурагчид маань нийт 156 сая бодлого боджээ. Энэ бол том үр дүн гэж онцлов.
Финландын сургалтын арга зүйгээр шинжлэх ухааны үндэслэлтэй боловсруулсан төрөл бүрийн түвшний дасгал, даалгаврыг тоглонгоо гүйцэтгэхэд суралцагчид өөрт тохирсон олон ур чадварт суралцаж байгаа гэсэн үг юм. Хиймэл оюун ухаан дээр суурилсан энэхүү платформ суралцагчдын 750 гаруй чадварыг тэмдэглэн авч, өөрт нь тохирсон ялгаатай дасгал даалгаврыг санал болгон, багшид суралцагч бүрийн явцын талаар нарийн мэдээлэл өгч, багшийн ажлыг хөнгөвчилдөг зэрэг олон давуу талтай.
Суралцагчдын есдүгээр сарын платформд зарцуулсан дундаж хугацаа долоо хоногт 45 минут, гүйцэтгэсэн дасгал, даалгаврын тоо 187 байсан бол сүүлийн 7 хоногт 75 минут, 337 дасгал, даалгавар болж өссөн байна. Энэ нь дэвтэр дээр бодлого бодохоос 7 дахин олон бодлого бодож байна гэсэн үг аж.
