Дэлхийн ур чадварын байгууллагын ерөнхий ассамблэй нь хоёр жил тутамд хуралдаж, үйл ажиллагааны стратегиа хэлэлцэж, удирдах зөвлөлийн гишүүдээ шинэчлэн сонгож, ур чадварын уралдааны зохион байгуулалт, хөгжлийн асуудлыг ярьдаг.
Дэлхийн ур чадварын уралдаан зохион байгуулагдсанаас хойш 2025 онд 75 дахь жилтэйгээ золгож байна. 2025 оны ерөнхий ассамблэйг зохион байгуулах эрхийг Хорват улс авч, өнө эртний түүх соёлын өлгий нутаг, аялал жуулчлалын хамгийн таатай бүс Дубровник хотод зохион байгуулж байна.
“WorldSkills General Assembly Dubrovnik 2025” өнөөдөр буюу 2025 оны 10 дугаар сарын 13-ны өдөр эхэлж байгаа бөгөөд 4 өдрийн турш үргэлжлэх тус хуралд 89 орны 340 гаруй төлөөлөгч оролцож байна.
Монгол Улсыг төлөөлж, Засгийн газрын хэрэгжүүлэгч агентлаг Боловсролын ерөнхий газрын дарга Т.Ням-Очир, WorldSkills Mongolia байгууллагын төлөөлөл оролцож байна.
