Би “бетонон ширэнгэн ой” болсоор байгаа дүүрэгт амьдардаг.
Би Сүхбаатар дүүргийн оршин суугч. Манай дүүргийн маш олон хороо нийслэлийн дахин төлөвлөлтөд орж байгаа. Тиймдээ ч орон сууц, хотхонууд өрдөг тоглоом шиг л хагас жилийн дотор баригдаж дуусаад иргэдийг орон сууцжуулж байна. Гэвч ямар ч стандарт, зохион байгуулалтгүйн улмаас иргэдэд хамгийн ээлгүй хот, аюултай амьдрах орчныг бий болгосоор л…
Энд хэн хамгийн их хохирч байгаа гээч…
Нэг байраас ердөө 30-40 метрийн зайд нөгөө байр. Тэр голд нь хүүхдийн тоглоомын талбай. Тоглоомын талбай ч гэж дээ таобаогоос хамгийн хямдаар авч болох гулсуур, байнга гинж нь тасардаг хоёр савлуур тэгээд л болоо. За тэгээд нийслэлд авто зам дээрээ багтдаггүй машинууд грашдаа багтахгүй, гараад гаднах зогсоол ч байхгүй. Тэгээд л арга ядсан жолоочид явган хүний замыг эвдлэн барин, бүр цаашлаад хүүхдийн тоглоомын талбай руугаа шахаад зогсчихдог. Хүүхдүүд бөмбөгөөр эсвэл хөөцөлдөж тоглож байхдаа өнөөх машинуудыг цохиж, мөргөснөөс хавиар нэг дохиолол ажиллаж түгжээтэй хотын, стресстэй дүүргийн, давчуу байрны ууртай ах, эгч гарч ирээд бүлтийсэн жаахан хүүхдүүдийн толгойг нь эргэтэл загнах нь хамгийн аймар.
Оршин суух иргэдийн тоо нэмэгдэж байгаа ч орчин нь улам л “зэрлэгшиж” байгаа нь нийслэлийн хот төлөвлөлт, хороо дүүргийн газар зохион байгуулалтын хариуцлагагүй байдал.. Өдөр шөнөгүй хүнд даацын машин зөрөлдсөн шороон замуудын тоос тортгон дунд тохойн чинээхэн хүүхдүүд гүйж явахыг харах харгислал шиг санагддаг. Дээрээс нь тэдгээр мянга мянган хүүхдүүдэд сургууль, цэцэрлэгийн хомсдол үүсэж боловсролын тэгш бус хүртээмжийн харгайг үүрүүлсээр… Бас хэдэн хүүхэд цэцэрлэггүйн улмаас цоожтой хаалганы цаана үлдэж амь нас эрүүл мэндээрээ хохирдгийг бодохоор тэр чигээрээ “буруу гагнагдсан чагтан түгжээ” мөнөөсөө мөн.
Стандартаа ягштал мөрддөгсөн бол бидний ирээдүй эрсдэлд орохгүй, одоогоороо амар тайван аюулгүй орчинд амьдарч байх байсан. Гэвч одоо улс төрийн шийдвэр гаргах түвшинд шат шатны авлигал, хээл хахууль цэцэглэснээс болж ногоон байгууламж ч үгүй бетонон хороод сүндэрлэж нар ч үзэгдэхгүй “уйтгартай саарал хот” өргөжин тэлсээр байгаа нь харамсалтай. Бүх стандарт бус зүйлс нүдэн дээр дээр ил байхад шаардлага тавьж байгаа ч хүн алга. Хүний амьдрах орчныг аюултай, аз жаргалгүй, стандартгүй барьж бас хүлээн авч байгаа хүмүүс нь хариуцлагаа хүлээ.
Би “бетонон ширэнгэн ой”-д тав тухгүй, айж амьдардаг…
