Их Британий алдарт ах дүү морь унаачид дэлхий дээрх хамгийн урт болоод хэцүү гэж тодорхойлогддог морин уралдаанд оролцжээ. Гус, Чарли, Берт нар нь Шропшир муж дахь Лудлов хотоос мянган километр газрыг найман хоногийн турш зөвхөн мориор туулах ганц зорилготой Монгол улсыг зорьсон юм.
Унаачид хөвч хөндий, гол мөрөн, намгархаг газар, элсэн манхан, задгай хээр гэх мэт төрөл бүрийн газруудаар монгол морьд унан аялсан байна. 23 настай Гус Рид “Бид бага байхаасаа л морь унасан, гэртээ үргэлж морьтой байсан ч үүн шиг сорилт үзсэнгүй” хэмээн хэлжээ.
Энэхүү морь уналга нь Чингис хааны 1224 онд бүтээсэн холын зайд шуудан дамжуулах системд суурилсан гэдгээрээ онцлогтой. Байршил тогтоох GPS төхөөрөмж ашиглан 40 километр тутамд морьдоо сольдог бөгөөд тухайн зайнд хамгийн түрүүнд бариандаа хүрсэн нь ялагчаар тодорно. 19 настай Берт Рид “Бид өдөрт 100 км явахыг хичээж байсан” гэв.
Оролцогчид зөвөн орон нутгийн цагаар өглөөний долоогоос оройн долоон цагийн хооронд морь унах боломжтой байсан бөгөөд замд тааралдсан буудалд буудаллах эсвэл нутгийн иргэдийнд хонож байжээ. 21 настай Чарли Рид “Буудаллах болоход унаж явсан морины цохилт минутад 56 эсвэл түүнээс бага байх ёстой. Хэрэв тийм биш байвал оролцогч хоёр цагийн шийтгэл хүлээдэг” гэлээ. Уралдааны морьд нь хагас зэрлэг адуу бөгөөд жил бүр нийт 1,500 адуу үзлэгт орон уралддаг. “Тэдний зарим нь үнэхээр зэрлэг. Мордсон даруйд булгин унагаах гэж оролддог” гэж Гус хэлсэн юм.
Нийт 44 унаачид оролцсон бөгөөд Гус зургаадугаар байр, Берт арваннэгдүгээр байрт оржээ.
Эх сурвалж – https://www.bbc.com/news/articles/crmwez3zpreo
Бэлтгэсэн дадлагажигч оюутан Э.Номин
