Өмнөд Солонгост 20-иод насны эрэгтэй 76 муур хөнөөсөн хэргээр шүүхээс 14 сар (1жил 2 сар)-ын хорих ял сонслоо. Тодруулбал Солонгосын амьтдыг хамгаалах хуулийг зөрчсөн хэргээр тухайн иргэнийг буруутган зүүн өмнөд Солонгосын Чанвон дүүргийн шүүх шийдвэр гаргасан. Ассошиэйтед Пресс агентлагт гаргасан шүүхийн шийдвэрийн дагуу тухайн иргэн 2022 оны арванхоёрдугаар сараас 2023 оны есдүгээр сарын хооронд уг хэргийг үйлдсэн ба түүний хэлснээр муур түүний машиныг маажиж зураас үүсгэсэнээс амьтдыг үзэн ядах болсон хэмээжээ.
Тэрээр золбин муурнуудыг барьж, мөн заримыг нь үрчилж авсныхаа дараа боомилж, хайчаар хөнөөж мөн машинаар дайруулан хөнөөсөн байна. Тиймээс түүний энэ хэргийг урьдаас санаатайгаар удаа дараа “үгээр хэлэхийн аргагүй харгис” гэмт хэрэг үйлдсэн тул хорих ялаас зайлсхийх боломжгүй гэж шүүх үзжээ. Шүүхээс тогтоосон шийтгэл нь тухайн хүн өөр гэмт хэрэгт холбогдоогүй, тухайн хүний сэтгэцийн эрүүл мэндийн байдал тодорхойгүй, шүүхийн шийдвэрийг давж заалдсан мөн үйлдсэн хэрэгтээ гэмшиж байгаа хэвээр байгааг онцлоод тохирсон ялыг оноосон гэж мэдээлсэн байна.
Уг хэргийн мөрөөр олон улсын Humane Society байгууллагын Өмнөд Солонгос дахь төлөөлөгчийн газрын захирал Сео Борами хэлэхдээ, “Энэ шийтгэл нь Солонгосын нийгэм амьтдын сайн сайхны төлөө санаа зовниж, үүнтэй адил утгагүй харгислалыг үл тэвчихийг харуулж байна”, “Энэ харгис хэрцгий хэрэг нь амьтдыг амьд амьтан гэж хууль ёсны дагуу хүлээн зөвшөөрч, хуулийн хамгаалалтыг цаашид бэхжүүлэх Иргэний хуулийн нэмэлт, өөрчлөлтийг батлахын ач холбогдлыг онцолж байна” хэмээжээ.
koreantimes.com
