“MORNING BIRD” булангийн уншигчдадаа шинэ долоо хоногийн мэнд хүргэе. Ингээд энэ өдөр Монгол Улсын түүхэнд болсон онцлох үйл явдлуудаас түүвэрлэн хүргэж байна.
1912 оны энэ өдөр Манлайбаатар Ж.Дамдинсүрэн тэргүүтэй Монголчууд Хөлөнбуйр аймгаас хятад түшмэл цэргийг хөөн гаргаж, нутаг орноо эзэн суув.
1913 оны энэ өдөр Монгол Улсын Ерөнхий сайд Төгс-Очирын Намнансүрэн тэргүүтэй төлөөлөгчид Хаант Орос улсад айлчлав. Айлчлалын үеэр Сангийн бүх хэргийг захиран шийтгэгч сайд Гадинбалын Чагдаржав, Хаант Орос улсын бүрэн эрхт төлөөлөгч Иван Кростовец нар долоон зүйл гэрээнд гарын үсэг зурж, хоёр сая рубль зээлэхээр болжээ.
1935 оны энэ өдөр Баргын морьт цэргүүд болон Японы 450 цэрэг Монголын зүүн хилийн Халхын сүм, Монгол загасны харуулуудыг эзэлжээ.
1958 оны энэ өдөр Налайхын ил уурхай ашиглалтад оров.
1993 оны энэ өдөр Монголын худалдаа, аж үйлдвэрийн тэнхимийн дэд дарга Б.Мандалсүрэн тэргүүтэй Засгийн газрын эдийн засаг, гадаад худалдааны төлөөлөгчид БНХАУ-д айлчилжээ. Хоёр тал 1993 оны импорт, экспортын бараа бүтээгдэхүүний тухайд тохиролцон, БНХАУ-ын Засгийн газраас буцалтгүй тусламжийн хэлбэрээр Монгол Улсад Хятад хэлний сургалтын төв байгуулах баримт бичигт гарын үсэг зурав.