“MORNING BIRD” булангийн уншигчдадаа мягмар гарагийн мэнд хүргэе. Өнөө өглөө чиний хувьд ямар байна даа? Магадгүй заримд нь тийм ч сайн дулаарч өгөхгүй, банштай цай хийж идээд, орондоо өнжмөөр өдрүүд үргэлжилж байж ч болох юм. Гэхдээ л бид амьд байна, амьсгалж байна. Зүгээр л амьдралд талархах юмс дэндүү олон байдаг гэдгийг л хэлэх гэсэн юм аа. За одоо харин гол зүйлдээ оръё.
Бид өглөөг хэрхэн угтахаас тухайн өдрийн үр бүтээмж, цаашлаад сэтгэл санааны байдал хамаардаг гэдгийг та мэдэх үү? Тэгвэл сэтгэл судлалын ухааны профессорууд хүмүүсийн өглөө бүр хийдэг “буруу зуршил”-уудын тухай хуваалцжээ.
1.ХАНГАЛТТАЙ САЙН НОЙР АВЧ ЧАДАХГҮЙ БАЙХ ҮЕД
Шөнө хангалттай сайн унтаж амраагүй үед бидний симпатетик мэдрэлийн тогтолцоо ачаалж эхэлдэг. Ингэснээр зүрх хурдан цохилж, жижигхэн зүйлд ч стрэсдэж, бүх үйл хөдлөл дарамттай санагддаг аж. Мэдээж урд өдөр нь эрт унтаж чадсан хүн, орой унтсан хүнтэй харьцуулахад хамаагүй сайн нойр авсан байна. Тиймээс аль болох эрт унтаж, өглөөг сайхан эхлүүлээрэй.
2.БЭЛТГЭЛГҮЙ БАЙХ
Эмх цэгцгүй, замбараагүй зүйлс хүнийг маш их стрэсдүүлдэг. Тэгэхээр урд орой нь маргаашийнхаа бэлтгэлийг хийгээд унтах нь өглөөг дажгүй эхлүүлэхэд чухал байх нь ээ. Төсөөл дөө, өглөө сэрээд ямар хувцас өмсөхөө мэдэхгүй, авч явах зүйлсээ бэлдээгүй, өрөө чинь замбараагүй байна гээд. Тэгэхээр бэлтгэлгүй байдал таны өглөөг онцгүй болгохыг бүү зөвшөөр.
3.ӨГЛӨӨНИЙ ЦАЙ УУХГҮЙ БАЙХ
Өглөө юм идэхийг хүсэхгүй байсан ч заавал өглөөний цай уух хэрэгтэй бөгөөд энэ нь стресс, уур бухимдлаас сэргийлэх ач холбогдолтой. Бид өглөө идэж байгаа зүйлээсээ хангалттай шим тэжээл авах ёстой бөгөөд энэ нь тухайн өдрийг эрч хүчтэй, стрессгүй өнгөрүүлэх эхлэл юм.
4.УТСАА ШҮҮРЧ АВААД, ЦАХИМ ПЛАТФОРМУУДАА ШАЛГАХ
Дийлэнх хүмүүс өглөө сэрээд хамгийн түрүүнд утсаа нээгээд, цахим сүлжээгээ шалгадаг. Гэсэн хэдий ч мэргэжилтнүүдийн зүгээс энэ зуршлаа засахыг зөвлөдөг. Ялангуяа өглөө босоод цахим сүлжээгээ шалгасны дараа уурлаж бухимдах, сөрөг таагүй сэтгэл хөдлөл мэдрэгдэж байвал энэ нь стрессийн шинж тэмдэг юм. Тиймээс цахим сүлжээгүй өглөөг эхлүүлээрэй.
